Бүгін денсаулық сақтау саласындағы сатып алу рәсімдерін жүйелеу, ашықтықты қамтамасыз ету және тиімділікті арттыру мақсатында арнайы семинар-кеңес ұйымдастырылды. Маңызды басқосуды облыстық мемлекеттік сатып алу басқармасы өткізіп, оған денсаулық сақтау басқармасының өкілдері, медициналық ұйымдардың басшылары, қаржы және сатып алу бөлімдерінің жауапты мамандары қатысты.
Семинар-кеңес барысында саладағы өзекті мәселелер кеңінен талқыланып, сатып алу үдерістерін жетілдіру бағытындағы нақты қадамдар қарастырылды. Атап айтқанда, дәрілік заттарды, медициналық бұйымдарды, фармацевтикалық қызметтерді және медициналық техниканы сатып алу тәртібі жан-жақты түсіндірілді. Сонымен қатар, сатып алуды жоспарлау, конкурс рәсімдерін өткізу, жеткізушілерді іріктеу және келісімшарттардың орындалуын бақылау тетіктері бойынша тәжірибелік ұсыныстар берілді.
Жиын барысында қолданыстағы заңнама талаптарын сақтау, сыбайлас жемқорлық тәуекелдерінің алдын алу және бюджет қаражатын тиімді пайдалану мәселелеріне ерекше назар аударылды. Спикерлер мемлекеттік сатып алулардың ашықтығын қамтамасыз ету – медициналық қызмет сапасын арттырудың маңызды алғышарты екенін атап өтті.
Сондай-ақ, аталған бағыттағы нормативтік-құқықтық актілерді жетілдіру қажеттігі сөз болып, заңнамаға өзгерістер енгізу мәселелері қарастырылды. Қатысушылар тарапынан тәжірибеде кездесетін қиындықтар мен түйткілді мәселелер көтеріліп, оларды шешу жолдары бойынша бірқатар ұсыныстар айтылды.
Семинар соңында қатысушылар арасында сұрақ-жауап алаңы ұйымдастырылып, пікір алмасу өтті. Мамандар өзара тәжірибе бөлісіп, сатып алу рәсімдерін одан әрі оңтайландыру, цифрландыруды күшейту және процестердің тиімділігін арттыру бойынша нақты ұсыныстарын жеткізді.
Мұндай семинар-кеңестер сала мамандарының кәсіби біліктілігін арттырып қана қоймай, денсаулық сақтау жүйесінде сапалы әрі қолжетімді қызмет көрсетуге бағытталған маңызды бастамалардың жүзеге асуына оң ықпал ететіні сөзсіз.