Кітап керуені – рухани жаңғырудың ауылдағы көрінісі.
Қамыстыбас ауылында өткен «Кітап керуені» акциясы кітап оқуды насихаттаумен қатар, тұрғындардың рухани өмірін байытуға бағытталған маңызды мәдени шара болды. Бүгінде ақпараттық технологиялар қарқынды дамыған кезеңде кітаптың құндылығын дәріптеу, әсіресе ауыл тұрғындары арасында оқуға деген қызығушылықты арттыру өзекті мәселелердің бірі болып отыр. Осы тұрғыдан алғанда, аталған акцияның маңызы ерекше.
Іс-шараның ерекшелігі – оның тек кітап көрмесімен шектелмей, мазмұнды мәдени алаңға айналуында. Ауыл тұрғындары түрлі жанрдағы әдебиеттермен танысып қана қоймай, кітап талқылауларына қатысып, шеберлік сабақтарынан тағылым алды. Бұл кітаптың тек білім көзі ғана емес, қоғамды біріктіретін рухани құндылық екенін тағы бір мәрте дәлелдеді.
Акция аясында жергілікті ақын-жазушылармен өткен кездесулер де оқырмандар үшін ерекше әсерлі болды. Жұмабай Жақып, Ерғали Абдулла, Абай Елеш және Айдар Сайлауов сынды қаламгерлермен жүздесу ауыл тұрғындарына әдебиет әлеміне жақындай түсуге мүмкіндік берді. Мұндай кездесулер жастардың шығармашылыққа қызығушылығын арттырып, ұлттық әдебиетті насихаттауға ықпал етеді.
Шара барысында кітапхана мамандарының еңбегі еленіп, марапатталуы да сала қызметкерлерінің қоғамдағы рөлін айқындай түсті. Ал белсенді оқырмандардың арнайы номинациялармен және қаржылай сертификаттармен марапатталуы кітап оқуға деген ынтаны күшейте түсетіні сөзсіз.
Кітап керуенінің тағы бір маңызды қыры – мемлекеттік мекемелер мен қоғам өкілдерінің, кәсіпкерлердің ортақ іске жұмыла білуі. Белгілі кәсіпкерлердің демеушілік қолдау көрсетуі мәдени жобалардың табысты жүзеге асуына азаматтық жауапкершіліктің де ықпалы зор екенін көрсетті.
Жалпы, Қамыстыбас ауылында өткен «Кітап керуені» акциясы ауыл мәдениетін дамытуға, кітап оқу мәдениетін қалыптастыруға және тұрғындардың рухани сұранысын қанағаттандыруға бағытталған тағылымды шара ретінде есте қалды. Мұндай бастамалар оқырман санын арттырып қана қоймай, ұлттық құндылықтарды дәріптеуге және қоғамның интеллектуалдық әлеуетін көтеруге қызмет етеді. Кітапқа деген құрмет бар жерде рухани даму да жалғаса беретіні анық.