Сексеуіл кентінде 100 орындық «Оқушылар үйі» мен 50 орындық «Өнер мектебінің» іргетасының қалануы – жай ғана құрылыс жұмысының басталуы емес, өңірдің болашағына салынған инвестиция. Бұл бастама балалардың шығармашылық, ғылыми және рухани дамуына жаңа мүмкіндік беретін маңызды әлеуметтік жоба ретінде бағаланады.
Соңғы жылдары Қызылорда облысында білім беру инфрақұрылымын жаңғыртуға ерекше мән беріліп келеді. «Келешек мектептері» жобасы аясында жаңа мектептердің салынуы, «Оқушылар сарайы», «Сыр жұлдыздары» академиясы, Ботаникалық білім беру орталығы мен заманауи лагерьдің ашылуы – осы жүйелі жұмыстың нақты нәтижесі. Сексеуілдегі жаңа нысандар сол игі бастамалардың заңды жалғасы болып отыр.
Аталған жобаның тағы бір маңызды қыры – мемлекеттік және корпоративтік серіктестіктің үлгісі. «Қазақстан Темір Жолы» ұлттық компаниясының демеушілігімен жүзеге асатын құрылыс әлеуметтік жауапкершіліктің нақты көрінісіне айналды. Бұл шалғайдағы елді мекен балаларының да үлкен қалалардағы құрдастарымен тең дәрежеде білім алып, өнер мен шығармашылыққа ден қоюына жол ашады.
Облыс әкімі Мұрат Ергешбаевтың тұрғындармен кездесуінде тек білім саласы ғана емес, елді мекеннің инфрақұрылымдық мәселелері де көтерілді. Әсіресе, көптен күткен «Сексеуіл–Бейнеу» автомобиль жолы құрылысының басталуы және кентке кіреберіс жолды жөндеу мәселесінің қаралуы тұрғындардың көкейіндегі өзекті сұрақтарға жауап берді. Бұл билік пен халық арасындағы ашық диалогтың нақты көрінісі.
Жалпы, Сексеуілдегі бүгінгі оқиға өңірлік дамудың жаңа кезеңін аңғартады. Балаларға арналған білім мен өнер ордаларының салынуы, жол инфрақұрылымының жақсаруы және тұрғындардың ұсыныстарының ескерілуі – мемлекет саясатының басты мақсаты адам капиталы мен өмір сапасын арттыруға бағытталғанын көрсетеді. Бүгін қаланған іргетас ертең елдің дамуына үлес қосатын білімді, талантты ұрпақтың қалыптасуына негіз болмақ.