Ер жігіт елдің тұтқасы, отанның қорғаны. Әскер қатарында қызмет етіп, Отан алдындағы парызын өтеуге әрбір азамат міндетті.
Отан қорғаушы! Қандай қасиетті де құдіретті сөз.
Әскер қатарында қызмет етіп, Отан алдындағы парызын өтеуге әрбір азамат міндетті.
Себебі, туған жерді, елді, атамекенді қорғау – қасиетті борыш.
Бұл дегеніміз – батырлық пен табандылық, отан сүйгіштік пен Отанға шексіз қызмет етудің нышаны.
Қай дәуірде болсын, Отан қорғау әрбір Қазақстан азаматының қасиетті борышы болып келген. Өзін ер азаматпын деп санайтын кеудесінде ар-намысы, бойында жігері, жүрегінде оты бар әрбір жан үшін ең басты парыз, ең басты адами міндет – осы.
Алайда соңғы уақытта азаматтарды әскери қызметке шақыру үлкен проблемалық мәселеге айналуда.
Біздің елімізді қорғау әрбір азаматтың қасиетті борышы және конституциялық міндеті болып табылады (Конституцияның 36-бабы).
Жыл сайын Қазақстан Президенті азаматтарды әскер қатарына шақыруды жариялайды. Оны ұйымдастыру жергілікті атқарушы органдарға жүктелген және «Әскери қызмет және әскери қызметшілердің мәртебесі туралы» Заңға (бұдан әрі – Заң) сәйкес жүзеге асырылады.
Әскерге шақыруды кейінге қалдыруға немесе шақырудан босатылуға құқығы жоқ 18-27 жас аралығындағы азаматтар шақыруға жатады (Заңның 31-бабы).
Әскери қызметке шақырылуға жататын азаматтар жергілікті әскери басқару органының шақыру қағазы бойынша шақыру комиссиясына келуге міндетті.
Бүгін Қазалы ауданында Отан алдындағы борыштарын өтеуге әзір азаматтарды күзгі мерзімді әскери қызметке шығарып салуға орай патриоттық шара өтті.
Қазалы мәдени-демалыс кешеніндегі «Даңқ» аллеясында өткен шараға аудан әкімінің орынбасары Дәурен Тлеумбетов, аудандық қорғаныс істері бөлімі бастығының міндетін атқарушы Дінмұхаммед Бекзадаев, ауған соғысының ардагері, қызыл жұлдыз иегері Күмісбай Серікбаев және әскерге аттанушы азаматтардың ата-аналары мен аудан жастары қатысты.
Патриоттық шарада Дәурен Тлеумбетов сөз сөйлеп, әскерге аттанғалы тұрған азаматтарға Отан алдындағы борыштарын адал атқарып, әскери қызметте жақсы жағынан көрініп, еліміздің таңдаулы оқу орындарына түсу үшін арнайы сертификатпен аман-есен оралуларына тілектестігін білдірді.
Шарада әскер қатарына аттанып бара жатқан жас сарбаз Бағдаулет Көшербай салтанатты түрде шығарып салушыларға ризашылығын білдіріп, Қарулы күштер сапында абыройлы қызмет ететіндігін жеткізді. Сондай-ақ өз қатарластарында әскери борышын өтеуге шақырды.
Айта кету керек, күзгі мерзімді әскери қызметке аттанып жатқан 10 азаматта Қазақстан Республикасы Ұлттық Қауіпсіздік комитетінің шекара қызметінде әскери борыштарын өтейтін болады.