Черногория мемлекетінің Будва қаласында өткен жастар арасындағы бокстан әлем чемпионатының қола жүлдегері Аслан Елдібайұлын жерлестері қошеметпен қарсы алды.
92 келіден жоғары салмақ дәрежесінде сынға түскен Аслан Елдібайұлы, Қырғызстан спортшысын 4:0 есебімен ұтып, айқын басымдылықпен Қытай спортшысын накаутка жіберіп, Өзбекстан өкіліне 1:4 есебімен жол берген спортшымыз қола жүлдені иемденді.
Талай дүбірлі додада топ жарып ел намысын абыроймен қорғаған бокстан спорт шебері Аслан Елдібайұлы №7 Олимпиадалық резервтің мамандандырылған балалар-жасөспірімдер мектебінің бітіруші түлегі. Көк туымызды көкке көтерген Аслан Елдібайұлы қазақстандықтардың үмітін ақтап, рухын аспандатты.
Іс-шарада аудан әкімінің орынбасары Бектас Нуридинов әлем чемпионатының жүлдегерін құттықтап, астына атбозат мінгізіп, бапкерлеріне қаржылай сертификат табыстады.
-«Бұл жеңіс – алтынға бергісіз ауданымыз үшін спорт саласындағы зор жетістік болды. Елдігіміздің еңсесін көтеріп, көк туымызды әлемдік аренада желбіретер – өзіңдей жастар мемлекетіміздің, тұтастай халықтың мақтанышы деп білемін.»- деді аудан әкімінің орынбасары.
Сондай-ақ, ауданның құрметті азаматтары Серік Мұсабай мен Мадияр Ахметов Асланды әлі талай спорт бәсекесінде Олимпиадада ел абыройын биікке көтеретініне сенім білдірді.
Іс-шарада Аслан Елдібайұлы бұл жеңіспен тоқтап қалмайтынын, жанкүйерлер сенімін ақтауға бар күшін салатынын айтты.