Санитариялық ахуал тұрақты бақылауда. Қызылорда облысында санитариялық-эпидемиологиялық ахуал тұрақты. Дегенмен мамандар аурудың алдын алу бағытындағы жұмысты әлсіретуге болмайтынын атап отыр. Себебі инфекциялық аурулардың бірқатары бойынша көрсеткіштердің төмендеуі профилактикалық шаралардың нәтижесін көрсеткенімен, халықтың вакцинациядан бас тартуы, кене арқылы таралатын инфекциялар және өнім қауіпсіздігі секілді мәселелер әлі де жіті бақылауды қажет етеді. Облыстық санитариялық-эпидемиологиялық бақылау департаментінің мәліметінше, есепті кезеңде бақылаудағы 94 нозологияның 55 түрі бойынша ауру тіркелмеген. Ал 23 нозология бойынша сырқаттанушылық өткен жылдың сәйкес кезеңімен салыстырғанда төмендеген. Оның ішінде «А» вирусты гепатиті мен тұмау көрсеткіштерінің азаюы жүргізіліп жатқан санитариялық және профилактикалық жұмыстардың тиімділігін аңғартады. Инфекциялық аурулардың алдын алуда вакцинацияның орны ерекше. Жыл басында қызылшаға байланысты қосымша иммундау науқаны ұйымдастырылып, 5450 адам вакцина алған. Нәтижесінде наурыз-сәуір айларында облыста қызылшаның бірде-бір жағдайы тіркелмеген. Бұл – вакцинацияның инфекция таралуын тежеудегі нақты нәтижесін көрсететін маңызды көрсеткіш. Алайда иммундаудан бас тарту мәселесі әлі де өзекті болып отыр. Сондықтан тұрғындарға вакцинацияның маңызын түсіндіру және медициналық алдын алу шараларымен қамтуды арттыру жұмыстары жалғаса бермек. Сонымен қатар адам папилломасы вирусына қарсы вакцинациялау да кеңейтілген. Есепті кезеңде 3771 қыз бала тиісті вакцина алған. Бұл болашақта адам папилломасы вирусымен байланысты аурулардың алдын алуға бағытталған ұзақ мерзімді профилактикалық шаралардың бірі. Өңірдегі аса қауіпті инфекциялар бойынша да жағдай тұрақты: оба, құтыру, тырысқақ және сібір жарасы тіркелмеген. Дегенмен табиғи ошақты инфекциялар мәселесі назардан тыс қалған жоқ. Конго-Қырым геморрагиялық қызбасының 11 жағдайы анықталып, кене шағуына байланысты 1403 тұрғын медициналық көмекке жүгінген. Бұл көрсеткіш тұрғындардың кене маусымында сақтық шараларын күшейтуі қажеттігін көрсетеді. Әсіресе табиғатқа шығатын азаматтардың жеке қорғаныс шараларын сақтауы, кенеден қорғанатын киім киюі және кене шаққан жағдайда уақыт жоғалтпай медициналық көмекке жүгінуі маңызды. Санитариялық қауіпсіздіктің тағы бір маңызды бағыты – тұтыну өнімдерінің сапасы. Есепті кезеңде 58 нысаннан алынған 810 сынама зертханалық тексеруден өткізіліп, оның 133-і техникалық регламент талаптарына сәйкес келмеген. Талапқа сай емес өнімдердің анықталуы бұл бағыттағы бақылаудың қажеттігін көрсетеді. Тиісті шаралар қабылданып, бірқатар сауда нысандарындағы талапқа сәйкес келмейтін өнімдер сатылымнан алынған. Ауыз судың сапасы да тұрақты мониторингте. Орталықтандырылған сумен жабдықтау жүйелерінен алынған сынамалар зертханалық зерттеуден өткізіліп, анықталған сәйкессіздіктер бойынша тиісті шаралар қабылданған. Бұл әсіресе жазғы кезеңде маңызды, өйткені ауа температурасының жоғарылауы су сапасына қойылатын санитариялық талаптардың сақталуын одан әрі күшейтуді қажет етеді. Балалардың қауіпсіздігі де санитариялық бақылаудың негізгі бағыттарының бірі болып отыр. Мектептерде, мектеп-интернаттарында және асханаларда мониторинг жүргізіліп, анықталған кемшіліктерді жою жөнінде нұсқамалар берілген. Жазғы сауықтыру лагерлерінің дайындығы, ондағы ауыз судың сапасы, тамақтану жағдайы мен санитариялық талаптардың сақталуы да бақылауға алынған. Жалпы, облыстағы санитариялық-эпидемиологиялық ахуалдың тұрақтылығы – алдын алу жұмыстарының нәтижесі. Алайда бұл бағытта босаңсуға негіз жоқ. Инфекциялық аурулардың алдын алу, халықты вакцинациямен қамту, аса қауіпті ауруларды ерте анықтау, балалар нысандарындағы санитариялық талаптарды сақтау және тұтыну өнімдерінің қауіпсіздігін қамтамасыз ету тұрақты бақылауды қажет етеді. Алдағы кезеңде осы бағыттардың күшейтілуі тұрғындардың денсаулығын қорғап қана қоймай, өңірдегі санитариялық тұрақтылықты сақтаудың маңызды кепілі болмақ.

БӨЛІСУ