Қоғамдық кеңес – халық үні мен билік шешімін тоғыстыратын алаң
Қызылорда облысының әкімі Мұрат Ергешбаевтың облыстық қоғамдық кеңес мүшелерімен кездесуі өңірдегі өзекті мәселелерді ашық талқылауға арналған кезекті жиын ғана емес, қоғам мен билік арасындағы диалогтың жаңа кезеңін айқындайтын маңызды басқосу болды. Кездесуге басқарма және департамент басшылары, бұқаралық ақпарат құралдарының өкілдері қатысып, өңірдің даму бағытына қатысты ұсыныстар ортаға салынды.
Жиынның Қазақстан Республикасының жаңа Конституциясының заңды күшіне енуімен тұспа-тұс өтуінің де өзіндік символдық мәні бар. Конституциялық реформалар мемлекеттік басқару жүйесін жаңғыртып қана қоймай, азаматтардың шешім қабылдау процесіне қатысу мүмкіндігін кеңейтуді көздейді. Осындай жағдайда қоғамдық кеңестердің рөлі бұрынғыдан да арта түседі.
Облыс әкімі өз сөзінде қоғамдық кеңесті «билік пен қоғам арасындағы алтын көпір» деп атады. Бұл анықтама кеңестің бүгінгі міндетін дәл сипаттайды. Өйткені қоғамдық кеңес мемлекеттік органдардың қызметін қоғамдық бақылау тетігі ретінде ғана емес, халықтың талап-тілегін жеткізіп, нақты ұсыныстар әзірлейтін кеңесші институт ретінде де маңызды орын алады.
Кездесу барысында облыстық қоғамдық кеңестің жаңадан сайланған төрағасы Наурызбай Байқадамовқа қолдау білдірілуі де алдағы жұмыстың сабақтастықпен жалғасатынын көрсетті. Ал кеңес мүшелерінің қатарында ғылым, білім, кәсіпкерлік, бұқаралық ақпарат құралдары және депутаттық корпус өкілдерінің болуы қабылданатын ұсыныстардың жан-жақты әрі кәсіби негізде әзірленуіне мүмкіндік береді.
Жиында көтерілген мәселелердің өзі өңір үшін ең өзекті бағыттарды қамтыды. Ауылдық елді мекендерді газдандыру, су ресурстарын тиімді пайдалану, тарихи-мәдени нысандарды мемлекет меншігіне қайтару, тұрғын үй құрылысын дамыту және инвестициялық жобаларды жүзеге асыру сияқты тақырыптар халықтың күнделікті тұрмысымен тікелей байланысты.
Әсіресе, су мәселесі Қызылорда өңірі үшін стратегиялық маңызға ие. Климаттық өзгерістер мен трансшекаралық өзендердің су көлемінің азаюы жағдайында суды үнемдеу технологияларын енгізу, ирригациялық жүйелерді жаңғырту және ресурсты тиімді басқару өңірдің ауыл шаруашылығының тұрақтылығына тікелей әсер етеді. Сондықтан қоғамдық кеңесте бұл мәселенің көтерілуі – уақыт талабынан туындаған қажеттілік.
Газдандыру мәселесі де әлеуметтік маңызы жоғары бағыттардың бірі. Елді мекендерді табиғи газбен қамтамасыз ету тұрғындардың өмір сүру сапасын арттырып қана қоймай, экологиялық ахуалды жақсартуға және кәсіпкерліктің дамуына да серпін береді. Ал тұрғын үй құрылысы мен инвестициялық жобаларға қатысты ұсыныстар өңір экономикасының ұзақмерзімді дамуына бағытталған.
Кездесуде тарихи нысандарды мемлекет меншігіне қайтару туралы ұсыныстың айтылуы да назар аудартады. Бұл мәдени мұраны сақтау, тарихи орындарды тиімді пайдалану және туризмді дамыту бағытындағы жұмыстарға тың серпін беруі мүмкін.
Жалпы, қоғамдық кеңестердің басты құндылығы – әртүрлі көзқарастардың бір алаңда тоғысып, ортақ шешім іздеуге мүмкіндік беруінде. Мұндай кездесулер арқылы тұрғындардың ұсыныстары тікелей атқарушы билікке жетіп, мемлекеттік саясаттың өңірлік ерекшеліктерді ескере отырып жүзеге асуына ықпал етеді.
Бүгінгі жиынның тағы бір ерекшелігі – ашық пікір алмасу форматында өтуі. Ғалымдар, депутаттар, білім саласының өкілдері, кәсіпкерлер мен журналистер өз ойларын еркін айтып, өңірдің дамуына қатысты ұсыныстарын жеткізді. Бұл қоғамдағы сенім мәдениетін қалыптастырудың және мемлекеттік басқарудың ашықтығын арттырудың маңызды көрінісі.
Қорытындылай айтқанда, облыс әкімінің қоғамдық кеңес мүшелерімен кездесуі азаматтық қоғам институттарының әлеуетін күшейтуге бағытталған маңызды қадам болды. Өйткені өңірдің тұрақты дамуы тек мемлекеттік органдардың жұмысына ғана емес, қоғамның белсенді қатысуына, сарапшылардың ұсыныстары мен халықтың пікірінің ескерілуіне де тікелей байланысты. Осындай ашық диалогтар көбейген сайын қабылданатын шешімдердің сапасы артып, өңірдің әлеуметтік-экономикалық дамуы жаңа деңгейге көтеріледі.