Қармақшы ауданында Мемлекет басшысы бастамашылық еткен «Таза Қазақстан» республикалық экологиялық акциясы аясындағы жұмыстар жүйелі түрде жалғасуда. Аталған бастама қоршаған ортаның тазалығын сақтауға, елді мекендердің көркін арттыруға және тұрғындардың экологиялық мәдениетін қалыптастыруға бағытталған.
Бүгін аудан көлемінде кезекті жалпыхалықтық сенбілік ұйымдастырылып, оған барлық ауылдық округтердің тұрғындары, мемлекеттік мекемелердің қызметкерлері, дербес бөлімдер, білім беру ұйымдарының ұжымдары, жастар ұйымдары мен еріктілер белсене қатысты. Тазалық шарасы барысында аудан орталығы мен елді мекендердегі көшелер, саябақтар, аллеялар, қоғамдық орындар және әлеуметтік нысандардың аумақтары ретке келтірілді.
Сенбілік кезінде санитарлық тазалық жұмыстарына ерекше мән берілді. Қатысушылар көше бойларындағы ретсіз өскен арамшөптерді жұлып, жаяу жүргіншілер жолдары мен қоғамдық орындардың айналасын тазалады. Сонымен қатар жол жиектері, ағаштар мен қоршаулар әктеліп, көркейту және абаттандыру жұмыстары жүргізілді. Бұл жұмыстар елді мекендердің эстетикалық келбетін жақсартып қана қоймай, тұрғындарға жайлы әрі таза орта қалыптастыруға мүмкіндік береді.
Аудан әкімінің тапсырмасына сәйкес өңірде абаттандыру, көгалдандыру және санитарлық тазалық шаралары тұрақты бақылауда. Осы бағыттағы жұмыстар жыл бойы жалғасып, ауданның барлық елді мекендерін қамтуда. Бүгінгі сенбілік барысында жиналған тұрмыстық және қатты қалдықтар арнайы техникалардың көмегімен шығарылып, белгіленген орындарға жеткізілді.
Экологиялық акция аясындағы жұмыстарға жастардың белсенді қатысуы ерекше қуантты. Жас буын өкілдері табиғатты қорғау мен қоршаған ортаны таза ұстаудың маңыздылығын насихаттап, аудан тұрғындарын тазалық мәдениетін сақтауға шақырды. Мұндай игі шаралар қоғамда жауапкершілік пен туған жерге деген жанашырлық сезімін нығайта түседі.
«Таза Қазақстан» акциясы – бір күндік науқан емес, ол әрбір азаматтың күнделікті өмір салтына айналуы тиіс маңызды бастама. Тазалық пен тәртіпке негізделген бұл жұмыстар өңірдің экологиялық ахуалын жақсартып қана қоймай, ауданның әлеуметтік келбетін жаңғыртуға да оң әсерін тигізуде.
Қармақшылықтар алдағы уақытта да туған жердің тазалығы мен көркеюіне үлес қосып, аудан аумағын абаттандыру бағытындағы жұмыстарды жалғастыра бермек.