Сыр өңірінің экономикасында ауыл шаруашылығы ерекше орын алады. Соңғы жылдары климаттың өзгеруі мен су тапшылығының күшеюі шаруаларға жаңа талаптар қойып отыр. Мұндай жағдайда егіс алқаптарын әртараптандыру, жоғары өнімді дақылдарды енгізу және су үнемдеу технологияларын қолдану – аграрлық саланың басты міндетіне айналды.
Осы мақсаттағы жұмыстармен танысу үшін аудан әкімі Айтбай Жандарбеков Жөлек ауылдық округіндегі «Шолпан Ана» шаруа қожалығының егіс алқабында болып, атқарылып жатқан жұмыстардың барысын көрді.
Биыл шаруашылық ауыл шаруашылығы өндірісін әртараптандыру бағытында маңызды қадам жасап, 70 гектар жерге дәндік жүгері орналастырған. Егістікке өңірдің табиғи-климаттық ерекшеліктеріне бейімделген, өнімділігі жоғары «ДКС 5709 ФАО 580» гибридті жүгері сорты себілген.
Мамандардың айтуынша, мұндай жоғары өнімді сұрыптар агротехникалық талаптар толық сақталған жағдайда мол өнім алуға мүмкіндік береді. Сондықтан шаруашылықта егіс науқанына ерекше дайындық жүргізілген. Жер сапалы өңделіп, тұқымдар мұқият іріктелген. Минералды тыңайтқыштар енгізіліп, барлық жұмыстар белгіленген технологиялық талаптарға сай атқарылуда.
Жүгері дақылы соңғы жылдары еліміздің көптеген өңірлерінде сұранысқа ие бола бастады. Ол мал азығы ретінде де, қайта өңдеу өнеркәсібінде де кеңінен қолданылады. Сондықтан бұл дақыл ауыл шаруашылығы өнімдерінің көлемін арттырумен қатар, шаруашылықтардың экономикалық тиімділігін көтеруге де ықпал етеді.
Бүгінде аудан көлемінде 2130 гектар жерге дәндік жүгері егілген. Бұл – өңірдегі ауыл шаруашылығы құрылымдарының жаңа бағыттарды игеруге деген ұмтылысының айқын көрінісі. Ең бастысы, осы алқаптардың басым бөлігінде заманауи су үнемдеу технологиялары енгізілген.
Нақтырақ айтқанда, 2000 гектар жерге тамшылатып және жаңбырлатып суару тәсілдері қолданылуда. Ал дәстүрлі технология бойынша 130 гектарға ғана егіс жүргізілген. Бұл көрсеткіштер аудан шаруаларының су ресурстарын тиімді пайдалануға бағытталған жұмыстарды жүйелі қолға алғанын аңғартады.
Сыр өңірі үшін су мәселесі әрдайым өзекті. Сырдариядағы су көлемінің азаюы, трансшекаралық өзендерге түсетін жүктеменің артуы ауыл шаруашылығына жаңа көзқарас қалыптастыруды талап етеді. Сондықтан суды көп қажет ететін ескі тәсілдерден біртіндеп бас тартып, әр тамшыны тиімді пайдаланатын технологияларға көшу – уақыт талабы.
Су үнемдеу технологияларының артықшылығы тек суды аз жұмсаумен шектелмейді. Бұл тәсілдер өнімділікті арттырып, еңбек шығынын азайтады және тыңайтқыштардың тиімділігін көтереді. Нәтижесінде шаруашылықтардың табысы артып, өндіріс тұрақтылығы қамтамасыз етіледі.
Аудан әкімі сапар барысында аграрлық секторды дамытуда инновациялық технологияларды кеңінен енгізудің маңыздылығына тоқталып, ауыл шаруашылығы саласындағы жұмыстардың сапалы әрі белгіленген талаптарға сай жүргізілуін назарға алды.
Бүгінде ауыл шаруашылығы тек егін егіп, өнім алумен ғана өлшенбейді. Ол ғылымды, технологияны және тиімді басқаруды қажет ететін күрделі салаға айналды. «Шолпан Ана» шаруа қожалығының тәжірибесі осы бағыттағы оң өзгерістердің нақты көрінісі деуге болады.
Егіннің бітік шығуы – тек бір шаруашылықтың жетістігі емес, аудан экономикасының дамуына қосылған үлес. Сондықтан жаңа технологияларды енгізіп, өнімділігі жоғары дақылдарды өсіруге бет бұрған шаруалардың еңбегі өңірдің азық-түлік қауіпсіздігін нығайтып, ауыл тұрғындарының әл-ауқатын арттыруға қызмет етпек.