Қызылорда қаласының инфрақұрылымын жаңғырту, тұрғындардың өмір сүру сапасын арттыру және өңірдің ғылыми-өндірістік әлеуетін күшейту бағытындағы маңызды жобалар облыс басшылығының тұрақты бақылауында. Осы мақсатта облыс әкімі Мұрат Ергешбаев қала аумағындағы бірқатар стратегиялық нысандарды аралап, атқарылып жатқан жұмыстардың барысымен танысты.
Сапар алдымен Тасбөгет кентіндегі бас су жинау қоймасынан басталды. Бұл нысан қала тұрғындарын сапалы ауызсумен қамтамасыз етуде ерекше маңызға ие. Тәулігіне 56 500 текше метр су қабылдайтын кешенге «Степь», «Арай» және «Бас тоған» су көздерінен алынған таза су жиналып, кейін арнайы насос станциялары арқылы тұтынушыларға жеткізіледі. Су сапасы бес сатылы механикалық тазартудан өткізіліп, зертхана мамандары тарапынан тәулік бойы бақылауда ұсталады.
Халық саны артып, қала аумағы кеңейген сайын инженерлік инфрақұрылымға түсетін жүктеме де көбейеді. Сондықтан ауызсу жүйесінің тұрақты әрі сапалы жұмыс істеуі – тұрғындардың әлеуметтік әл-ауқатына тікелей әсер ететін маңызды факторлардың бірі. Өңір басшысы жауапты сала мамандарына жұмысты жүйелі үйлестіріп, нысанның тұрақты қызметін қамтамасыз етуді тапсырды.
Қала өмірінің ажырамас бөлігі саналатын қоғамдық көлік саласы да назардан тыс қалған жоқ. Бүгінде «Қызылорда автобус паркі» ЖШС арқылы 300 автобус 32 бағыт бойынша жолаушыларға қызмет көрсетуде. Кәсіпорында 700-ге жуық адам еңбек етеді. Соңғы жылдары қоғамдық көлік паркін жаңарту, қызмет сапасын арттыру бағытында бірқатар жұмыстар атқарылғанымен, тұрғындардың талап-тілегі де артып келеді. Сондықтан облыс әкімі жолаушыларға қолайлы жағдай жасау, қозғалыс кестесінің сақталуы және қызмет көрсету мәдениетін жетілдіру мәселелеріне ерекше назар аударды.
Қала тұрғындарының бос уақытын тиімді өткізуіне және балалардың қауіпсіздігіне бағытталған жобалардың бірі – Абай даңғылы бойындағы көпқабатты тұрғын үйлер аулаларында салынып жатқан спорт және ойын алаңдары. Құны 1,9 миллиард теңгені құрайтын жоба аясында 29 тұрғын үйдің ауласы жаңғыртылып, балалар ойын алаңдары, шағын футбол және воркаут алаңдары бой көтеруде.
Бұл бастама тұрғындардың сұранысынан туындаған әлеуметтік маңызы жоғары жобалардың қатарына жатады. Себебі қазіргі таңда балалардың қауіпсіз әрі заманауи алаңдарда ойнауы, жастардың спортпен шұғылдануына жағдай жасау – қоғам денсаулығы мен тәрбие мәселесінің маңызды бөлігі. Облыс әкімі құрылыс сапасына ерекше көңіл бөліп, жұмыстарды белгіленген мерзімде аяқтауды тапсырды.
Сапар барысында өңірдің ғылыми-инновациялық дамуына серпін беретін тағы бір маңызды нысан – Қорқыт ата атындағы Қызылорда университеті жанынан салынып жатқан Инжинирингтік парк құрылысы таныстырылды. Бұл жоба өңірдің ғылыми әлеуетін жаңа деңгейге көтеруге бағытталған.
Инжинирингтік парк құрамында археология және физика-химиялық талдау зертханалары, жасанды интеллект орталығы, робототехника, жерді қашықтан зондтау және ІТ бағытындағы зертханалар жұмыс істейтін болады. Сонымен қатар мұнда 90 орындық дәрісхана, 140 орындық конференц-зал және заманауи компьютерлік аудиториялар қарастырылған.
Бүгінде әлем елдері цифрлық технологиялар мен инновациялық өндірістерге басымдық беруде. Осы тұрғыдан алғанда Инжинирингтік парк тек білім беру нысаны ғана емес, ғылым мен өндірісті ұштастыратын өңірлік инновация орталығына айналмақ. Мұнда студенттер мен жас ғалымдар заманауи зерттеулер жүргізіп, жаңа жобаларды жүзеге асыруға мүмкіндік алады.
Жалпы, облыс әкімінің жұмыс сапары барысында қаралған нысандардың барлығы өңір тұрғындарының тұрмыс сапасын жақсартуға бағытталған маңызды жобалар саналады. Ауызсу, қоғамдық көлік, балалар қауіпсіздігі мен ғылымды дамыту – бүгінгі қоғам үшін өзекті бағыттар. Сондықтан бұл жобалардың уақытылы әрі сапалы жүзеге асуы Қызылорданың әлеуметтік-экономикалық дамуына тың серпін бермек. Облыс басшылығының тікелей бақылауы аталған бастамалардың нәтижелі орындалуына негіз болмақ.