Қызылорда облыстық кәсіпкерлер палатасының мәжіліс залында салалық Құрылыс кеңесінің кезекті отырысы ұйымдастырылды. Жиынға құрылыс саласының өкілдері, мемлекеттік органдар мамандары және кәсіпкерлер қатысып, саладағы өзекті мәселелерді кеңінен талқылады.
Кеңес отырысын Палата директорының орынбасары Салауат Құлмахан жүргізіп, күн тәртібіндегі негізгі бағыттармен таныстырды. Оның айтуынша, құрылыс саласындағы жүйелі мәселелерді ашық диалог арқылы шешу – өңірдегі кәсіпкерлікті дамытудағы маңызды қадамдардың бірі.
Жиын барысында басты назар құрылыс нысандарының өрт қауіпсіздігі талаптарына сәйкестігіне аударылды. Осы бағытта Қызылорда облыстық төтенше жағдайлар департаментінің басшысының орынбасары Темірбек Бейсенбин баяндама жасап, мемлекеттік қабылдау кезеңінде өрт қауіпсіздігі бойынша қорытынды беру тәртібін жан-жақты түсіндірді. Ол өз сөзінде нысандарды пайдалануға қабылдау кезінде қауіпсіздік талаптарының толық сақталуы адам өмірін қорғауда шешуші рөл атқаратынын атап өтті.
Сонымен қатар, отырыста кәсіпкерлерді алаңдатып отырған маңызды мәселелердің бірі – құрылыс нысандарын салу кезінде сәулет-жоспарлау тапсырмаларын (СЖТ) және техникалық шарттарды алу барысындағы кедергілер болды. Қатысушылар қызмет көрсетуші ұйымдардың негізсіз бас тарту деректерін атап өтіп, бұл жағдайлар құрылыс процесінің созылуына және шығындардың артуына әкелетінін жеткізді.
Талқылау барысында аталған проблемаларды шешудің нақты жолдары ұсынылды. Атап айтқанда, мемлекеттік қызмет көрсету процестерін цифрландыру, өтінімдерді қарау мерзімдерін қысқарту және жауапты ұйымдардың ашықтығын арттыру қажеттігі сөз болды. Бұл ұсыныстар кәсіпкерлерге қолайлы жағдай жасап, құрылыс саласының тиімділігін арттыруға бағытталған.
Жиын соңында қатысушылар еркін пікір алмасып, өздерін толғандырған сұрақтарын қойып, сала мамандарынан тиісті жауаптар алды. Кеңес қорытындысы бойынша көтерілген мәселелерді жүйелі түрде шешу үшін нақты ұсыныстар пакеті қалыптастырылып, алдағы уақытта тиісті органдарға жолданатын болды.
Жалпы, мұндай кездесулер құрылыс саласындағы түйткілді мәселелерді дер кезінде анықтап, оларды бірлесіп шешуге мүмкіндік береді. Бұл өз кезегінде өңірдегі құрылыс сапасын арттырып, қауіпсіздік талаптарының сақталуын қамтамасыз етуге және кәсіпкерлік ортаның дамуына оң әсерін тигізеді.