Қазір Қызылорда қаласындағы көпқабатты тұрғын үйлерді орталықтандырылған ыстық сумен қамтамасыз ету жұмыстары қарқынды жүргізілуде. Мемлекет басшысының, Үкіметтің қолдауымен, облыс әкімінің үйлестіруімен тұрғын үйлерді ыстық сумен қамту жұмыстарының бірінші кезеңіне Үкімет резервінен 11 млрд. теңге бөлінген болатын.
Бұған дейін Сол жағалаудағы көпқабатты тұрғын үйлер ыстық суға қосылса, бүгінде бұл жұмыстар Астана мөлтек ауданында жалғасуда. Қазір осы мөлтек аудандағы 550 пәтер ыстық суға қосылды.
Қазіргі уақытта жоба шеңберінде 186 үйге құбырлар толығымен тартылып, пәтерлерге есептегіш құралдар мен тіреуіштер орнатылуда. Аталмыш жұмыстарға «Байқоңыр» әлеуметтік-кәсіпкерлік корпорациясы жүзеге асырушы оператор болып бекітілген.
Корпорацияның ыстық сумен жабдықтау басқармасының басшысы Бауыржан Күшенбаевтың айтуынша, бұл мақсатта Үкімет резервінен биылға 11 млрд теңге бөлінген. Аталмыш жұмыстар екі кезеңмен жүргізіледі. Бірінші кезең бойынша биыл 186 үй, екінші кезеңде 2025 жылы 250 үй орталықтандырылған ыстық сумен қамтылады.
“Мемлекеттік сатып алу конкурстары нәтижесінде ЖШС «Мелиаратор», ЖШС «BSG инженеринг» және «Көкшетаугидрогеология» АҚ жеңімпаз ретінде анықталып, бүгінде аталмыш мердігер мекемелер тұрғын үйді ыстық сумен жабдықтау жұмыстарын жүргізуде. Алдағы уақытта дайын үйлерге ыстық су осылай кезекпен қосыла береді. Жалпы қала бойынша ыстық су толығымен жылдың соңына дейін іске қосылатын болады”, – деді Бауыржан Күшенбаев.
Мамандардың пікіріне сәйкес, ыстық су жүйесі тұтынушыларға электрлі су ысытқышқа (Аристон) қарағанда едәуір тиімді болмақ. Мәселен, су ысытқыш қондырғысы арқылы 50 литр суды ысытуға орта есеппен күніне 2 кВт, яғни 1 айда орта есеппен 2 м3 су пайдаланғанда 1 айға шамамен – 1 565,6 теңге төлейді екен. Ал жылу энергиясы арқылы су ысыту жүйесіне келер болсақ, бекітілген тариф бойынша 1 м3 – 172,03 теңге болады. Яғни, орта есеппен тұтынушы 2 м3 ыстық суды пайдаланғанда (1 м3 тарифі су, кәріз – 43,1 теңге, 49,69 теңге) қоса алғанда орташа есеппен шамамен – 529,66 теңге құрайды.
“Жүргізілген есептемелерге сәйкес, электрлі су ысытқыш қондырғысына қарағанда, орталықтандырылған ыстық су жүйесіне қосылу 1035,94 теңге айырмашылықты көрсетеді. Бұл 66,2 пайызға тиімді деген сөз. Осы ретте, қала тұрғындарын орталықтандырылған ыстық су жүйесіне қосылуға шақырамыз”, − дейді басқарма басшысы.