Бүгін премьер-министр Бектенов Олжас Абайұлының Сыр өңіріне сапары барысында білім саласында атқарылып жатқан ауқымды жұмыстар бойынша білім басқармасының басшысы Есжанов Асқарбек Темірбекұлы баяндады.
Басқарма басшысы облыста 28 техникалық және кәсіптік білім беру ұйымы жұмыс жасайтындығын, онда ауылшаруашылығы, құрылыс, медицина салаларына қажетті инженер, оператор, техник, электромеханик, аспаз, тігінші, графикалық дизайнер мамандары даярланатынын, мұнымен бірге мемлекет басшысы жариялаған “Жұмысшы мамандықтар” жылы аясында атқарылып жатқан ауқымды шараларға тоқталды.
Жалпы айта кететін болсақ, аймақтағы колледждерде білім алатын 20 341-ге жуық студенттің 64 пайызы мемлекеттік тапсырыс негізінде тегін оқиды. Қазіргі таңда нарықтық сұранысқа сәйкес жұмысшы мамандықтарға айрықша ден қойылып жатқандықтан алдағы жылы аталмыш мамандықтар бойынша мемлекеттік тапсырыс негізінде оқытуға басымдық берілетін болады.
Үкімет басшысы: “Барлық жұмыстар дұрыс, ары қарай жалғастырыңыздар!” деп аймақтағы білім саласында атқарылып жатқан жұмыстарға оң бағасын берді.
Мемлекет басшысы Ұлттық құрылтайда және халыққа арнаған Жолдауында кәсібилік пен еңбекқорлық қоғамда ең жоғары орында тұруы керегін, елімізде еңбекқор адам, кәсіби маман ең сыйлы адам болуға тиіс екендігін әрдайым айтып келеді. Биылғы Қазақстан халқына Жолдауында да 2025 жылды «Жұмысшы мамандықтары жылы» деп жариялады. Ендігі кезекте, техникалық және кәсіптік білім беру ең маңызды мәселеге айналары сөзсіз. Өйткені, экономиканы өркендетуде білікті мамандардың қажеттілігі артады. Аймақтың еңбек нарығына қажетті, сұранысқа ие мамандықтардың ұзақ мерзімді болжамын анықтау үшін мамандықтар Атласы әзірленуде. Қорқыт ата атындағы Қызылорда университеті мамандықтар Атласын әзірлеу мақсатында 20 қызметкерді арнайы оқудан өткізді.
Сонымен қатар Олжас Абайұлы Сырдария өзенінің сол жағалауынан ашылған оқушылар сарайында болып, ондағы «Робототехника», «Теле студио», «Бағдарламалау» кабинеттерінің жұмыстарымен танысты.