Сырдария аудандық ауруханасында облыстық денсаулық сақтау басқармасының 9 айды қорытындылау бойынша көшпелі алқа мәжілісі болып өтті.
Алқа мәжілісіне аймақтың бас дәрігері Искаков Олжас Ермекұлы төрағалық етiп, қатысушыларға күн тәртібіндегi қаралатын мәселелер мен сала бойынша атқарылуы тиiс жоспарларды таныстырды.
Жиында алдымен Сырдария аудандық ауруханасының жұмысы талданды. Одан соң ағымдағы жылдың 9 айлық қорытындысы бойынша ана мен балаға медициналық көмек көрсету жағдайы және атқарылған жұмыстарын талдау, медицина ұйымдарын кадрлық қамтамасыз етудің өзекті мәселелерi мен медицина ұйымдарының рейтингтік бағалау көрсеткіштерін талдау бойынша баяндама жасалды.
Мемлекет басшысы өз Жолдауында халыққа медициналық көмекті қолжетімді ету, ана мен бала денсаулығын сақтай отырып, өлім-жітім көрсеткішін төмендету мемлекетіміздің басты басымдығы екенін атап өткен болатын. Халықтың медициналық мекемелер ұсынатын қызметтердің қолжетімділігі мен сапасы 7,9 пайызға жоғарылады.
-Биыл 1 қазанға дейін облыстағы бастапқы медициналық санитариялық көмек көрсету ұйымдарына 821 376 тұрғын тіркелген. Аймақ халқына 25 стационарлық 25 амбулаториялық-емханалық, 102 дәрігерлік амбулатория, 27 фельдшерлік акушерлік бекет, 93 медициналық бекет қызмет көрсетеді. Халықтың медициналық мекемелер ұсынатын қызметтердің сапасы мен қолжетімділігіне қанағаттану деңгейі 2023 жылы 2022 жылмен салыстырғанда 7,9% жоғарылап, 58,3-ті құрады, көрсеткіш Республика деңгейінен жоғары, – деді Басқарма басшысы.
Кездесу қорытындысында басқарма басшысы Олжас Ермекұлы сала мамандарына нақты тапсырмалар беріп, халық денсаулығын жақсарту – басты мiндет екендiгін атап өтті.