Бүгін аудан әкімі Мажит Самитовтың төрағалығымен мәжіліс отырысы өтті. Мәжілісте су тасқыны кезеңіне дайындық барысы және тұрмыстық қатты қалдықтарды басқару бойынша атқарылып жатқан жұмыстар туралы мәселелер қаралды.
Атап айтқанда, қыс-көктем мезгілдерінде су тасқынының алдын алу бойынша тиісті сала басшыларына құзырлы мекемелермен бірлесіп, жағдай күрделенген кезде жедел жұмылдырудың ұйымдастырылуын, төтенше жағдай кезіндегі эвакуациялық іс-шараларды пысықтау міндеттелді. Сонымен қатар, су тасқыны кезеңіне күштер мен құралдардың толық дайын болуы тапсырылды.
Күн тәртібіндегі екінші мәселе бойынша Жаңақорған кентінде салынуы жоспарланған тұрмыстық қатты қалдықтарға арналған полигонның жоба-сметалық құжаттарын жыл аяғына дейін мемлекеттік сараптамадан өткізіп, келесі жылға құрылыс жұмыстарын жүргізу үшін бюджетке өтінім беруді тапсырды.
Сонымен қатар, Өнеркәсіптік даму қоры арқылы қаржыландыруы жоспарланған «Комхоз Жаңақорған» ЖШС-нің қоқыстарды сұрыптау орталығы жобасының 1-ші кезеңінен аудандар арасында алдыңғы болып өткенімен 2-ші кезеңінен өтуде жұмыстар баяулап қалғанын ескертіп, 1 апта ішінде құжаттарды толықтырып, қайта тапсыру қажеттігін айтты.
Аудан әкімінің төрағалығымен өткен мәжілісте айтылған тапсырмалардың уақытылы және сапалы орындалуын бақылау сала бойынша жауапты аудан әкімінің орынбасарларына жүктелді.