Бүгін білім қызметкерлері арасындағы дәстүрлі «Спартакиада – 2024» жарысының марапаттау рәсімі өтті. Салтанатты жиынға Қызылорда қаласы бойынша білім бөлімінің басшысы Жаннат Мылтықбайқызы мен Қазақстандық оқу-ағарту, ғылым мен жоғары білім қызметкерлері салалық кәсіптік одағының қала бойынша төрайымы Ануза Аманжолқызы қатысып, жеңімпаз командалар мен спортшыларды құттықтады.
Аталмыш спартакиаданың мақсаты – білім қызметкерлері арасында салауатты өмір салтын қалыптастыру, оларды дене шынықтыру және спортпен жүйелі түрде айналысуға тарту, сондай-ақ бұқаралық спортты одан әрі дамыту және достық қарым-қатынасты нығайту.
Айта кетейік, білім қызметкерлері спартакиадада 8 спорт түрінен сынға түсті. Бәсеке тартысқа толы өтті.
Жалпы командалық есепте Б.Момынбаев атындағы №278 ІТ мектеп-лицей, ІІІ орын алса, ІІ орынды Тәкей Есетов атындағы №264 мектеп-лицейі иеленді. Ал, І орынды Әли Мүсілімов Атындағы Мектеп-лицей командасына жеңіп алды.
Жеңімпаз командалар мен спортшылар қалалық кәсіподақ комитетінің қаржылай және бағалы сыйлықтарымен марапатталды.
Қала ұстаздарына алдағы уақытта бастау алатын дәстүрлі «СПАРТАКИАДА – 2024» байрақты бәсекесінде сәттілік тілейміз! Жеңісті күнде жүздейік!