Студенттер республикалық интеллектуалдық ойынға жолдама алды.
Қазіргі таңда Қорқыт ата атындағы Қызылорда университетінің педагогикалық бағытында білім алатын 108 үздік студенті “Ыбырай” қоғамдық қорында стипендиат болып, білімін жетілдіруде.
Қордың қолдауымен студенттер қосымша білім алып қана қоймай, түрлі іс-шараларда бақтарын сынап жүр. Сондай-ақ университет қабырғасында “Ыбырай” ұйымын ашып, біршама жетістікке жетуде.
Әртүрлі мамандық студенттерінен құралған “Dariya” командасы 13 сәуір күні республикалық “Мұғалім” жобасының ұйымдастыруымен Шымкент қаласында өткен “INTELLECTA” интеллектуалды ойынының оңтүстік аймақтық кезеңінде жүлделі І орынды жеңіп алды. Ал “Snowdrop” командасы жүлделі ІІІ орынды қанағат тұтты.
”Dariya” командасының жетекшісі университет түлегі Азамат Абимолда болса, команда сапында университеттің 1 курс студенттері Шәміл Анарбай, Қабыл Дүйсек, Қуаныш Сапарбек, Мадияр Дузумбайұлы, Азамат Сеитмахамбет пен Бақдаулет Исаев болды. Жігіттерден құралған құрам 4 кезеңнен қарсыластарын айқын басымдықпен жеңіп, республикалық кезеңге жолдама алды.