Домбыра – ұлт рухын ұлықтаған мереке.
Қазалы ауданында Ұлттық домбыра күні кең көлемде аталып өтті. Әйтеке би кенттік мәдениет үйінде ұйымдастырылған «Күймен жеткен жүрекке» атты мерекелік мәдени шара ұлттық өнердің өміршеңдігін, халқымыздың рухани мұрасына деген құрметін және дәстүр сабақтастығын айшықтаған тағылымды кешке айналды. Өнер мен руханият тоғысқан мерекеге аудан әкімі Алмасбек Есмаханов қатысып, тұрғындарды Ұлттық домбыра күнімен құттықтады.
Биылғы мерекенің ерекшелігі – оның еліміздің қоғамдық-саяси өміріндегі маңызды кезеңмен тұспа-тұс келуі. Жаңа Конституцияның күшіне енуі мен Ұлттық домбыра күнінің қатар келуі ұлттық құндылықтар мен заманауи мемлекеттіліктің өзара сабақтастығын айқындайтын символдық мәнге ие болды. Бұл туралы аудан әкімі өз құттықтауында кеңінен тоқталып, ұлттық рух пен құқықтық мемлекеттің бір-бірін толықтыратын ұғымдар екенін атап өтті.
Өз сөзінде аудан басшысы домбыраны қазақ халқының рухани болмысын танытатын ең қасиетті құндылықтардың бірі ретінде бағалады. Шынында да, домбыра – тек музыкалық аспап емес. Ол – халықтың тарихын, дүниетанымын, азаттыққа деген ұмтылысын, қуанышы мен қайғысын ғасырлар бойы ұрпақтан ұрпаққа жеткізіп келе жатқан ұлттық мұра. Сондықтан домбыраны дәріптеу – өткенді құрметтеу ғана емес, ұлттық сананы нығайтып, жас ұрпақтың бойына елдік рухты сіңірудің маңызды жолы.
Мерекелік кеш барысында аудан өнерпаздары мен жыршы-термешілер қазақ күй өнерінің алтын қорына енген шығармаларды орындады. Ұлы күйшілердің мұрасы көрерменге ұсынылып, ұлттық музыканың тереңдігі мен көркемдігі тағы бір мәрте паш етілді. Күмбірлеген күйлер мен дәстүрлі әндер мерекенің мазмұнын байытып, көрермендерге ерекше рухани әсер сыйлады.
Шара аясында ұйымдастырылған көрме де көпшіліктің қызығушылығын тудырды. Онда ұлттық өнердің тарихын, домбыра жасаудың дәстүрін және қазақ мәдениетінің бай мұрасын танытатын жәдігерлер қойылып, келушілерге рухани таным көкжиегін кеңейтуге мүмкіндік жасалды. Мұндай көрмелер ұлттық мәдениетті дәріптеудің маңызды тетігі ретінде кейінгі ұрпақтың тарихи санасын қалыптастыруға қызмет етеді.
Қазалы ауданында ұлттық өнерді қолдау бағытындағы жұмыстар жүйелі түрде жүргізіліп келеді. Бүгінде ауданның мәдениет үйлері мен ауылдық клубтарында жиырмаға жуық жыр-терме және домбыра үйірмесі жұмыс істейді. Бұл үйірмелерде екі жүз елуден астам бала мен жасөспірім дәстүрлі өнердің қыр-сырын меңгеріп, ұлттық мәдениетпен сусындауда. Мұндай жүйелі жұмыс ұлттық мұраны сақтап қана қоймай, болашақ өнерпаздардың қалыптасуына берік негіз қалайды.
Ұлттық домбыра күні – халқымыздың мәдени болмысын айқындайтын ерекше мереке. Осындай тағылымды шаралар арқылы ұлттық өнерге деген құрмет артып, жастардың дәстүрлі мәдениетке қызығушылығы нығая түседі. Домбыраның күмбірі үзілмеген елдің рухы да асқақ болмақ. Сондықтан ұлттық құндылықтарды дәріптеу – өткенге тағзым ғана емес, болашаққа салынған рухани көпір.