Ата-ана мен отбасының басымдығы. Балаларды отбасына орналастырудың жаңа механизмдері ұсынылды.
«Біз үшін балалардың өз отбасыларында өсіп, тәрбиеленуі өте маңызды. Мемлекеттің саясаты отбасын қолдауға, баланы өз отбасында қалдыруға, ата-аналардың балаларды тәрбиелеу мен олардың қауіпсіздігін қамтамасыз етуде басқа адамдардан басым тұруына бағытталған. Мемлекет қиын өмірлік жағдайға тап болған отбасыларды қолдауға бағытталған шаралар қабылдап жатыр. Кәмелетке толмағандар істері жөніндегі комиссиялар, психологиялық қолдау орталықтары, отбасын қолдау орталықтары отбасыларға көмек көрсетеді. Біздің міндетіміз – әр баланың «отбасында өмір сүру және тәрбиелену» құқығын жүзеге асыруға барынша күш салу. Асырап алушы кәсіби отбасы жетім балаларды, ата-анасының қамқорынсыз және қараусыз қалған балаларды, отбасындағы қатыгездіктен зардап шеккен балаларды уақытша қарайды», – деді ведомство өкілі.
Заңнамада ата-аналардың өз баласын тәрбиелеудегі басымдық құқығы, туыстардың балаларды өз отбасыларына алу құқығы бекітілген. «Әйелдердің құқықтары мен балалардың қауіпсіздігін қамтамасыз ету мәселелері жөніндегі» заң жобасы қылмыстық және әкімшілік құқық бұзушылықтардың көптеген түріне жауапкершілікті қатаңдататын нормалардан бөлек, балалар ортасындағы жағымсыз құбылыстардың алдын алуға, ата-аналардың жауапкершілігін арттыруға бағытталған нормаларды қамтиды.
Білім беру ұйымдарының балаларды мектепішілік есепке алуды жүргізу жөніндегі міндеті енгізіледі. Бұл жоғары педагогикалық зейінді қажет ететін балаларға көмектесу үшін қажет. Сондай-ақ заң жобасында облыс әкімдерінің психологиялық қолдау орталықтарын ашу құзыреті бекітіледі. Бүгінде мұндай орталықтар еліміздің 11 өңірінде ашылған. Жыл соңына дейін басқа облыстарда да осы сияқты ұйымдар ашылады. Орталықтар балалар мен ата-аналардың кәсіби психологиялық көмекке қол жеткізуін қамтамасыз етеді.
Біріншіден, білім беру бағдарламаларына балалардың денсаулығы мен дамуына зиян келтіретін әдеттерден қорғау тақырыптары енгізілді. Мәселен, «Биология» пәнінде адамның дамуы үшін темекі шегу мен есірткінің зияны тақырыбы оқытылады (7-9 сыныптар); «Салауатты өмір салты» компоненті «Дүниетану» (1-4 сыныптар) және «Жаратылыстану» (1-6 сыныптар) пәндерінің мазмұнына енгізілген.«Екіншіден, білім беру ұйымдарының тәрбие жұмысының жоспарына полиция қызметкерлері мен медицина қызметкерлерінің қатысуымен білім алушылар арасында ақпараттық-түсіндіру жұмыстары жүргізіледі. Бұл жұмысқа 90 мың маман, 8 мыңнан астам педагог-психолог және 4 мың әлеуметтік педагог тартылды. Үшіншіден, білім беру ұйымдарының тәрбие жұмысының жоспары психоактивті заттар мен вейптерді қолданудың алдын алу шараларын қамтиды», – деді спикер.
2023 жылы оқушылардың бастамасы бойынша 3 мыңнан астам акция, челлендж және басқа да іс-шаралар өткізілді. Бұл жұмыс жалғасуда.
Сондай-ақ, Оқу-ағарту және Денсаулық сақтау министрліктері Дүниежүзілік денсаулық сақтау ұйымының «Денсаулықты нығайтуға ықпал ететін мектеп» жобасын іске асырып жатыр. Оның мақсаты – оқушылардың денсаулығын жақсартып, оларды жаман әдеттерден қорғауға балалардың өздерін, ата-аналар мен мектеп әкімшілігін тарту. Жобаға 1,2 мың мектеп қатысады, оны еліміздің басқа мектептерінде де ұйымдастыру жоспарда бар.