Облыстық білім басқармасының басшысы А. Есжанов Сырдария ауданында жұмыс сапарымен болып, бірқатар білім беру ұйымдарын аралады.
Сырдария аграрлы-техникалық колледжі 8 мамандық, 12 біліктілік бойынша ауыл шаруашылығы саласындағы мамандарды даярлайды. Қазіргі таңда колледжде 142 студент мемлекеттік тапсырыс негізінде білім алуда. Басқарма басшысы өндірістік шеберханалар, токарлық цех және пән кабинеттерін аралап, оқу орынның жағдайымен танысты.
Асқарбек Темірбекұлы мұнан соң О.Әбілпаттаев атындағы №210 орта мектебінде болды. Білім ордасындағы кітапхана, спорт зал, акт зал және пән кабинеттерін көріп, балалармен тілдесті.
Ал №137 орта мектеп өткен жылы цифрландыру бағытындағы жаңа модефикациялы «STEM» биология кабинетімен жабдықталған болатын. Бүгінгі күні оқушылар жоғары сапалы визуалды-интерактивті құрылғылармен сабақ өтуде.
Басқарма басшысы мектептерді аралау барысында оқу-тәрбие сапасын арттыруды, кітапханада оқырмандар санын көбейтуді және нәтижеге жұмыс жасауды тапсырды.
Сондай-ақ «Жайлы мектеп» ұлттық жобасы аясында бой көтеретін 300 орындық мектептің құрылыс алаңымен танысты. Заманауи білім ордасының құрылысы келер жылы басталатын болады.
Басқарма басшысының жұмыс сапары мұнан соң Шиелі ауданында жалғасты. Аудан орталығындағы бірнеше мектепті көріп, ұстаздардың ұсыныс-пікірлерін тыңдады.
Аралау барысында Асқарбек Темірбекұлы Шиелі аудандық “Сыр ұланы” лагерінің жұмысымен және жаңадан салынып жатқан Жаңатұрмыс ауылындағы №207 орта мектебінің құрылысымен танысты. Білім ордасы жыл соңына дейін пайдалануға беріледі деп жоспарлануда.
Ал №48 мектеп-лицейі мен №252 мектеп-гимназиясы орын тапшылығына байланысты қосымша құрылыс қажет етіп тұр. Бүгінгі күні аудандық білім бөлімі тарапынан жоба сметалық құжаттары әзірленіп, сараптамадан өткізілді.
Асқарбек Темірбекұлы сондай-ақ кент орталығынан салынатын 200 орындық оқушылар үйі мен 50 орындық өнер мектебінің құрылыс алаңына барды. Тиісті тапсырмаларды жүктеп, жүйелі жұмыс жасауға шақырды.