«Ауыл аманаты» бағдарламасы аясында ауыл тұрғындарын несиелендіруге 2029 жылға дейін 1 трлн теңге қаржы бөлінеді – ҚР АШМ.
«Жалпы, республика бойынша бүгінгі күні 4600-ден астам өтінім мақұлданып, 25 млрд теңге сомасында несие берілген», – деп нақтылады АШМ өкілі.
Бұл бағдарлама биыл республика көлемінде алғаш рет іске асырылып отыр. Бұл тұрғыда, мәселен, несие алуға өтініш білдірген азаматтардың құжаттарының дұрыс болмауы тәрізді мәселе бар екенін жеткізді спикер.
«Несие негізінен ауылдық елді мекендерде беріліп жатыр. Сондықтан кепілге қоятын мүліктері – ауылдағы үйлер, жерлер. Көп жағдайларда осындай ауылдағы үйлердің құжаттары дұрыс болмайды. Сол себепті несиелерді мақұлдау мерзімдері де ұзартылып жатыр. Несиелердің аз берілуінің бір себебі осы», – деді Т. Мұхамеджанов.
Спикердің айтуынша, «Ауыл аманаты» бағдарламасына бөлінген 100 млрд теңге биыл шамамен 17 мың ғана шағын несие беруге есептелген. Ал 2029 жылға дейін бұл бағдарламаға 1 трлн теңгеге дейін қаржы бөлу жоспарланып отыр.
«Келесі жылға біз тағы 100 млрд теңге бөлуді жоспарлап отырмыз. Қазіргі уақытта республикалық бюджеттің жобасы әзірленді, сол жоба аясында 100 млрд теңге қарастырылып отыр», – деді микрокредит беру департаментінің директоры.
Сонымен қатар ол «Ауыл аманаты» бағдарламасы бойынша несие алатын азаматтарға қойылатын талаптарды нақтылады.
«Ең басты талап – ауылдық елді мекеннің тұрғыны болуы керек және іске асыратын бизнес жобасы сол ауылдық жерде іске асырылуы тиіс. Бұл бағдарламаға жұмыссыздар да қатыса алады, сонымен қатар өзін-өзі жұмыспен қамтыған немесе жеке қосалқы шаруашылықпен айналысатын адамдар және өз ісін жаңа бастап жатқан кәсіпкерлер қатыса алады», – деп түйіндеді Т. Мұхамеджанов.
Аталған жобаның Қызылорда облысында жүзеге асырылуына биыл 3,0 млрд. теңге қаржы бөлінді.
Ағымдағы жылдың 20 шілдесінен бастап жоба аясында құжаттарды қабылдау басталды.
Ауыл тұрғындарының табысын арттыру жөніндегі жобаны ауқымдау шеңберінде берілетін микрокредиттер сенім білдірілген өкіл (агент) – «Байқоңыр» ӘКК» АҚ-ы арқылы ұсынылады. Жалпы бағдарлама 5 бағыт бойынша қаржыландырылады. Оның ішінде, өңдеу, егін, кооперацияны дамыту, мал және басқа да бағыттағы бизнес жобалар.
Микрокредиттер 5 жылға дейінгі мерзімге, ал мал шаруашылығы саласындағы жобалар үшін – 7 жылға дейін беріледі. Микрокредиттің ең жоғары сомасы – ауылдық елді мекендерде және шағын қалаларда – 2,5 мың АЕК-ке дейінгі соманы құрайды. Зәкірлік кооперацияны дамыту үшін 8,0 мың АЕК. Номиналды сыйақы мөлшерлемесі – жылдық 2,5 пайыздан аспайды.
Сондай-ақ микрокредиттер мына тұлғаларға беріледі:
– жұмыссыздар;
– зейнеткерлік жасқа жетпеген қысқартылатын жұмыскерлер;
– дара кәсіпкерлер ретінде тіркелмей кіріс алу мақсатында тауарларды, жұмыстар мен көрсетілетін қызметтерді өндіру (өткізу) жөніндегі қызметті дербес жүзеге асыратын адамдар немесе әрекетсіз дара кәсіпкерлер;
– отбасылық кәсiпкерлiкте еңбекақы төленбейтін қызметті дербес жүзеге асыратын адамдар;
– жеке қосалқы шаруашылықта сату (айырбастау) үшін өнім өндіру жөніндегі қызметті дербес жүзеге асыратын, табысы ең төменгі күнкөріс деңгейiнен аз адамдар;
– табысы ең төменгі күнкөріс деңгейiнен аз өндірістік кооператив мүшелері;
– ісін жаңадан бастаған немесе жұмыс істеп жүрген кәсіпкерлер.
Айта кететін жайт, микрокредиттер ауылдық елді мекендерде және шағын қалаларда жүзеге асырылатын жобаларға қарастырылады.
«Ауыл аманаты» жобасы бойынша бизнес-жоспар әзірлеуге кеңес алу үшін Қызылорда облысының Кәсіпкерлер Палатасына, «Бизнеске арналған үкімет» КММ-не хабарласуға болады.
Сонымен қатар, бағдарламаға қатысу үшін қажетті құжаттар тізбесін және кеңес алу үшін жергілікті әкімдікке жүгінуге болады. Жобаның шарттарына сәйкес келетін бизнес құжаттарының тізбесі жергілікті әкімдікке ұсынылады. Өз кезегінде, жергілікті әкімдік жинақталған құжаттарды «Байқоңыр» ӘКК» АҚ-на жолдайды.