Денсаулық сақтаудағы цифрлық технологиялар дәрігерлерге жүктемені біртіндеп азайтуға және көмекші міндеттердің бір бөлігін орта медицина персоналына беруге арналған, деп атап өтті Денсаулық сақтау вице-министрі Бейбіт Есенбаев Астана қаласының №10 емханасына барған кезде.
Мемлекет басшысының тапсырмасын орындау шеңберінде елордалық медициналық ұйымда жалпы практика дәрігерлерінің жұмысын оңтайландыруды көздейтін пилоттық жоба іске асырылуда.
Мұнда пациенттерді алғашқы дәрігерге дейінгі қабылдау бойынша негізгі жүктемені мейіргерлер көтереді, олар ақпараттық жүйеге қажетті мәліметтерді енгізеді және елеулі шағымдар болмаған кезде қабылдауды аяқтай алады.
Сондай-ақ, диспансерлік есепте тұрған науқастарға дәрі-дәрмектерге рецепт жазуды мейіргерлердің өздері ақпараттық жүйенің деректерін қолдана отырып шешеді. Сондықтан дәрігерге бұл уақытты жұмсаудың қажеті жоқ және жалпы пилоттық жобаның мысалында цифрлық технологиялар жалпы практика дәрігерлеріне жүктемені 40%-ға төмендетуге мүмкіндік береді.
Қазіргі уақытта мейіргердің дәрігерге дейінгі кабинетінде жүкті әйелдерді бастапқы есепке алу, жүктілік кезеңін бақылау, жүкті әйелдерді кезеңдік жоспарлы қабылдау, скринингтік бақылауды ұйымдастыру жүргізіледі, бұдан басқа, орта буын қызметкерлері балаға арналған диетаны көрсете отырып, аналарға (5 жасқа дейінгі балалары бар) арналған жұмыс кабинетін басқарады.
Бұл ретте Б. Есенбаев мейіргер практикасындағы олардың рөлін кеңейту мен күшейтудің арқасында мейіргерлер медициналық көмек процесінде белсенді қатысушыларға айналатынын атап өтті.
Тапсырмаларды беру бойынша бірқатар жаңалықтар ҚР Денсаулық сақтау министрлігінің жаңа стандартымен бекітілді, ол ағымдағы жылдың наурыз айында шығарылды және елімізде медициналық-санитариялық көмекті ұйымдастыруға бағытталған.
“Техникалық” жұмысқа уақытты барынша қысқарту дәрігерлерге пациенттерге көбірек уақыт бөлуге мүмкіндік береді, бұл медициналық көмекті сапалы көрсетуді айтарлықтай арттырады.
Медицинадағы цифрлық шешімдер дәрігердің күнделікті операциялардан жүктемесін азайту, мәліметтерді толтыру, пациенттерге сапалы медициналық көмек көрсету үшін оның уақытын босату бөлігінде тиімділіктің жоғары деңгейін көрсетеді.