Мәжіліс төрағасы Ерлан Қошанов Астана халықаралық форумы аясында Қазақстанға келген ЕҚЫҰ Парламенттік Ассамблеясының төрағасы Маргарета Седерфельтпен кездесті. Тараптар Қазақстан Парламенті Мәжілісі мен ЕҚЫҰ Парламенттік Ассамблеясы арасындағы ынтымақтастықты одан әрі дамыту мәселелерін талқылады. Ерлан Қошанов ЕҚЫҰ Парламенттік Ассамблеясы қауіпсіздік пен ынтымақтастықтың негізгі міндеттерін шешуде маңызды рөл атқаратынын атап өтті. Ол Маргарета Седерфельтке Астана форумындағы мазмұнды баяндамасы үшін және жақында өткен Мәжіліс пен мәслихаттар сайлауына халықаралық байқаушы ретінде қатысқаны үшін алғысын білдірді. Мәжіліс спикері ел Президенті бастамашы болған саяси реформаларды жүзеге асыру барысы туралы айтты. Парламенттің рөлін күшейтуге және сайлау жүйесіне, оның ішінде ЕҚЫҰ ұсынымдарына сәйкес жаңғыртуға ерекше назар аударылды. ЕҚЫҰ ПА басшысы өз кезегінде қазақстандық депутаттарға Ассамблея қызметіне белсенді қатысып, қолдау көрсеткені үшін алғыс айтты. Маргарета Седерфельт Қазақстанда болып жатқан саяси өзгерістерге де назар аударды.  – Мемлекет басшысы Қасым-Жомарт Тоқаев мырзаның көпвекторлы сыртқы саясатын және демократиялық реформаларын жоғары бағалаймын, – деді ЕҚЫҰ ПА Президенті. Кездесу қорытындысы бойынша тараптар ЕҚЫҰ Парламенттік Ассамблеясы аясындағы жан-жақты ынтымақтастықты одан әрі жалғастыруға келісті.

БӨЛІСУ