Облыста шегіртке зиянкестеріне қарсы өңдеу жұмыстары жүргізілуде. Ағымдағы жылы облыс бойынша барлығы 46 448 гектар жерге саяқ шегіртке зиянкестеріне қарсы химиялық өңдеу жүргізу болжанған.
Бүгінгі күні Қызылорда облыстық ауыл шаруашылығы және жер қатынастары басқармасы тарапынан Республикалық фитосанитарлық диагностика және болжамдар әдістемелік орталығының мәліметі бойынша, облыс аумағында саяқ шегірткеге қарсы өңдеу жұмыстарын жүргізу басталды.
Шегіртке зиянкесіне қарсы химиялық өңдеу жұмыстарын жүргізуге 9 дана жер үсті вентиляторлық бүріккіштер және 3 дана әуе кемелері химиялық өңдеу жұмыстарына қатысады.
Осыған сәйкес, аудан (қала) әкімдіктері тарапынан химиялық өңдеу жұмыстарын жүргізу кезінде бал ара омарталары және жан-жануарлар шаруашылығына зиян келтірмеу шаралары назарға алынып бал ара және мал шаруашылығымен айналысатын жеке және заңды тұлғаларға алдын-ала ескертулер жіберіледі.
Сондықтан, облыс тұрғындары және ауыл шаруашылығымен айналысатын жеке және заңды тұлғалар аудан (қала, ауыл, кент) әкімдіктері тарапынан жіберілген ескертулерді қатаң сақтау қажет.
Бүгінде Сыр өңірінде егін егу науқаны қызу жүруде. Биыл облыс бойынша 195,6 мың гектар жерге ауыл шаруашылығы дақылдарын орналастыру жоспарлануда. Оның ішінде негізгі дақыл күріштің көлемі – 83,9 мың гектарды құрайды. Жалпы осы жылы егіс көлемін – 7,0 мың гектарға, күріш көлемін – 5,3 мың гектарға, мал азықтық дақылдарды – 2,3 мың гектарға ұлғайту межеленуде. Ал Абай ауылындағы «Ақжол» шаруашылығы биыл 250 гектар жерге егін еккен. Шаруашылық бригадирінің айтуынша, өңірдегі су тапшылығына қарамастан жоғары өнім алуды көздеп отыр. Бүгін Өңірлік коммуникациялар қызметінің ұйымдастыруымен өткен көшпелі брифингте БАҚ өкілдері аталмыш шаруашылықтың жұмыс барысымен танысты.
-Біздің «Ақжол» шаруашылығы 1997 жылдан бері күріш егумен айналысып келеді. Соңғы жылдары өңірдегі су тапшылығы салдарынан шаруашылықтағы егіс көлемі біршама қысқарды. Дегенмен, біз қолда бар мүмкіндікті пайдалана отырып, 250-300 гектарға дейін егін егудеміз. Жалпы біздің шаруашылықта 15 адам еңбек етеді. Бүгінде мұндағы жұмысшылар Сыр салысын толық суға бастырып, 100 гектар жерге жоңышқа екті. Еккен әр гектардан жыл сайын 60 центнерден жоғары өнім жинаймыз. Шаруашылықта жалпы саны 6 техника қамтамасыз етілген, – деді «Ақжол» шаруашылығының өндіріс бригадирі Жетпісбай Ерденов.
Облыста егін егу жұмыстары 15 наурыздан басталған болатын. Бүгінгі күнге дейін 80,5 мың гектар жерге негізгі дақыл күріштің дәні себіліп, оның 72,0 мың гектары суға бастырылды. Ал дәндік жүгері – 210 гектарға, сүрлемдік жүгері – 420 гектарға, күнбағыс – 45 гектарға, соя – 64 гектарға, картоп – 1,7 мың гектарға, көкөніс – 3,7 мың гектарға егілді. Жалпы 3 979 бірлік ауыл шаруашылығы техникасы толық жөндеуден өткізіліп, көктемгі егін егу науқанына қатысуда.