ЕДБ мобильді қосымшаларында көрсетілетін мемлекеттік қызметтер спектрін кеңейту жалғасуда.
Екінші деңгейдегі банктермен азаматтар үшін мемлекеттік қызметтердің қолжетімділігін арттыру бойынша бірлескен жұмыс жалғасуда. Қазіргі уақытта жұмысынан айырылу бойынша төлем алуға өтінім беру мүмкіндігі қолжетімді, деп хабарлайды ҚР Еңбек және халықты әлеуметтік қорғау министрлігі.
Төлемді алу үшін тиісті өтінімді жұмыспен қамту орталығы, халыққа қызмет көрсету орталығы, «Электрондық үкімет» порталы, Enbek.kz электрондық еңбек биржасы арқылы немесе тиісті SMS-хабарламаға жауап бере отырып, проактивті түрде беру қажет болды. Енді «Halyk» мобильді қосымшасының пайдаланушылары «Мемлекеттік қызметтер» бөлімінде де өтініш бере алады.
«Азаматтарға әлеуметтік-еңбек саласының қызметтеріне қол жеткізуді қамтамасыз ету бойынша жұмыс әр түрлі платформаларда тұрақты жүргізілуде. ЕДБ арқылы біздің алғашқы қызметтеріміз 2021 жылы қол жетімді болды. Олар «Бала тууға және бала күтіміне байланысты жәрдемақы тағайындау» және «Бала бір жарым жасқа толғаннан кейін оның күтіміне байланысты табысынан айырылған жағдайда әлеуметтік төлем тағайындау». 2022 жылы бұл тізім тағы 4 қызметке кеңейді. Жұмысынан айырылу бойынша өтінім беру – биылғы жылы іске асырылған екінші қызмет», – деді ҚР Еңбек және халықты әлеуметтік қорғау вице-министрі Ербол Оспанов.
Сервисті ҚР Еңбек және халықты әлеуметтік қорғау министрлігі, ҚР Цифрлық даму, инновациялар және аэроғарыш өнеркәсібі министрлігі және «Қазақстан Халық банкі» АҚ іске асырды.