Көші-қон комитеті азаматтарымыздың шетелде жұмысқа орналасуына ведомствоаралық үйлестіруді жүзеге асырады – ОКҚ брифингі.
Орталық коммуникациялар қызметінің алаңында өткен 2023-2027 жылдарға арналған көші-қон саясатының тұжырымдамасын іске асыру туралы брифингте Еңбек және халықты әлеуметтік қорғау министрлігінің Көші-қон комитеті төрағасының міндетін атқарушы Ілияс Испанов журналистердің сұрақтарына жауап берді.
Заңнамалық жаңашылдықтарға сәйкес, Комитет енді азаматтарымыздың шетелде жұмысқа орналасу мәселелерін реттеуді ведомствоаралық үйлестірумен айналысатын болады.
Спикердің айтуынша, қазір АҚШ, Ұлыбритания, БАӘ, Катар, ЕО және ТМД мемлекеттері сияқты елдермен екіжақты қарсы шарттар жасасу мәселелері пысықталуда. Яғни, егер еңбек мигрантына Қазақстанда оның құқықтары мен мүдделерін қорғауға, әлеуметтік пакетінің сақталуына кепілдік беретін болсақ, онда екінші тарап та сол жерде еңбек келісімі бойынша жүрген азаматтарымыз үшін де сондай кепілдік береді.
Мысалы, Корея Республикасымен квоталар туралы келісім жасасу көзделіп отыр. Кейбір мәліметтер бойынша, бүгінде Оңтүстік Кореяда 35 мың қазақстандық, оның ішінде 25 мың этникалық кәріс бар, олар үшін жұмысқа орналасу мен тұрудың жеңілдікті рәсімдері көзделген. Квота 50 мың шегінде көзделеді.
Спикер журналистің өткен жылы ішінара жұмылдыру жарияланғаннан кейін біздің елге қанша Ресей азаматы келгені туралы және Ресей азаматтарының келуінің екінші толқыны күтіле ме деген сұрағына жауап бере отырып, қазіргі уақытта жағдай штаттық режимде жүріп жатқанын атап өтті. Күн сайын Қазақстанға шамамен 7 мың ресейлік келеді және соншасы кетеді. Оң немесе теріс динамика жоқ.
«Өткен жылы біздің мемлекеттік органдар Үкіметпен келісім бойынша бақылау тетіктерін пысықтады. Бірінші кезекте, бұл уақытша болуға тіркеуді алған кезде Қазақстан Республикасындағы жеріне келгенге дейін шекараны кесіп өтуінен бастап, процестерді автоматтандыру. Жаңа ережелерге сәйкес біздің елге келген адамдар мұнда 180 күнтізбелік күн ішінде 90 күннен артық бола алмайды. Бұл шаралар кез келген елдің азаматтарының тиісті тіркеусіз ұзақ уақыт болуын болдырмау үшін қабылданды», – деді Көші-қон комитетінің басшысының м.а.