Мемлекет басшысы Қасым-Жомарт Тоқаевтың 2021 жылғы 26 ақпандағы Жарлығымен Қазақстан Республикасында мемлекетті басқаруды дамытудың 2030 жылға дейінгі «Ең алдымен адамдар» – адамға бағдарланған моделін қалыптастыру Тұжырымдамасы қабылданды. Алты бөлімнен тұратын бұл құжатта ағымдағы жағдайды талдаудан бастап, халықаралық тәжірибеге шолу мен мемлекеттік басқарудың негізгі қағидаттары сараланған.
Мұндағы басты мақсат – адамдарға бағдарланған мемлекеттік басқарудың жаңа моделін қалыптастыру және осы тұжырымдаманы іске асырудың жолдарын айқындау. Қазіргі әлемдік ахуалдың турбуленттілік, өсіп келе жатқан құбылмалылық, әлеуметтік, экономикалық және саяси дамудың белгісіздігі дәуіріне аяқ басып отырғандығын ескере отырып, осынау ауқымды сын-қатерлерді еңсеру барысында мемлекетке деген қоғамдық сенім, оның өзгерістерге дайындығы мәселесі ерекше маңызға ие болмақ. Өйткені қоғамда неғұрлым тиімді мемлекеттік басқаруға, азаматтардың басқарушылық шешімдер қабылдауға қатысуына деген сұраныс бар. Оның басты себебі мемлекеттік басқарудың қолданыстағы әкімшілік-бақылауға негізделген моделінің халықтың үмітін толықтай ақтамағандығында сияқты. Бүгінгі таңда мемлекеттік басқарудың сервистік және адамға бағдарланған моделі әлі қалыптаспай отыр.
Осыған орай Тұжырымдамада мемлекеттік секторды трансформациялаудың мағыналық бағыты көрсетілген және мемлекеттік басқаруды жаңғыртудың негізгі қағидаттары, міндеттері мен тәсілдері айқындалған. Ол азаматтардың мемлекетпен өзара іс-қимылын жақсартуды, стратегиялық жоспарлаудың тиімділігін, мемлекеттік қызметтің кадр құрамының сапасын, квазимемлекеттік сектордың тиімділігін арттыруды, мемлекеттік аппаратты оңтайландыруды және мемлекеттік қызметтер көрсетудің проактивті форматына көшуді, жергілікті өзін өзі басқаруды дамытуды, реттеушілік және сыбайлас жемқорлыққа қарсы саясатты жетілдіруді, сондай-ақ сот және құқық қорғау жүйелерін өзгертуді көздейді.
Қазақстан Республикасы Мемлекеттік кызмет істері агенттігінің Қызылорда облысы бойынша департаменті КР Президенті жанындағы Мемлекеттік басқару академиясынын облыстық филиалымен бірлесіп, Қызылорда облыстық, қалалык, аудандық, және ауылдық деңгейдегі мемлекеттік қызмет көрсетуге жауапты қызметкерлеріне ағымдағы жылдың 7 сәуірінде «Ең алдымен адамдар» атты арнайы біліктілікті арттыру бойынша оқыту семинарын өткізді.
Департаменттің Мемлекеттік қызмет көрсету басқармасының басшысы Н.Сүлейменов «Ең алдымен адамдар» оқыту семинарында дәріс оқыды.
Н.Сүлейменов оқыту семинарында қызмет көрсету барысында халықпен тиімді және тығыз жұмыс жасау, қоғамдық қажеттіліктерді қанағаттандыру бойынша халықпен мемлекеттік органдардың арасында өзара қатынастардың тәсілдерін қалыптастыру жөнінде сөз қозғады.
Бұдан бөлек, дәрісте қызметтерді көрсету барысында күйзеліске шыдамдылық пен төзімділік, қызмет алушыларға бағдарлану әдістеріне басымдылық беру, көрсетілген қызмет сапасына сыртқы және ішкі бақылау жүргізу тетіктері мен заманауи ақпараттық жүйелерді пайдалану практикалық дағдылары қамтылып, консультативтік-әдістемелік көмек көрсетіп, семинарға қатысушылардың қойған сауалдарына жауап берді.
Алдағы уақытта аталған оқыту семинары өз жалғасын табатын болады.