Қазір Қызылорда қаласы аумағында өзен мұздан толық тазарған. Қыс бойы қатып қалғаны ақырындап төменгі бөлікке қозғалғаны байқалып отыр.
— Сеңнің жүруі облыс орталығынан өтіп кетті. Қазір қорғаныс бөгеттері қалыпты жағдайда тұр, — дейді облыстық төтенше жағдайлар департаментінің басқарма бастығы Бейбітхан Спанов.
Ал солтүстік аудандарда мұздың ұстасуы әлі де байқалады. Мұздың қалыңдығы — 20-40 сантиметр. Облыста су басу қаупі жоғары 29 елді мекен бар. Онда тұратын халық саны 70 мың адамға жуық.
— Дария бойында 61 эвакуациялық жинақтау, 71 эвакуациялық қабылдау пункті орналасқан. Сондай-ақ 22 уақытша орналастыру, 13 жылыту пункті жұмыс жасайды. Департаменттен 128 жеке құрам, арнайы мақсаттағы 25 техника, 6 жүзу құралы, 33 мотопомпа әзірлікке келтірілді, — деді Б.Спанов.
Облыс орталығы тұсында бес учаске қауіпті деп танылған. Мамандар аталған аумақтарды тәулік бойына бақылауға алып отыр.
Мамандардың сөзінше, Қызылорда қаласының тұсынан 22-28 ақпан аралығында сең жүрсе, наурыздың алғашқы жартысында ол Қазалы, Арал ауданына жетеді деген болжам бар.