Қызылорда медицина колледжі базасында басқарма басшысы Есжанов Асқарбек Темірбекұлының, облыстық денсаулық сақтау басқармасының басшысы Олжас Ысқақовпен облыстың медицина саласы ардагерлері, облыс орталығындағы колледж қызметкерлерінің қатысуымен «Білім-Кәсібилік-Инновация» атты ашық есік күні өтті.
Шарада Қызылорда медициналық жоғары колледжіндегі Білім-Кәсібилік-Инновация» тақырыбы бойынша презентацияның таныстырылымы жасалды. Арнайы атаулы, атап айтсақ терапия, педиатрия, хирургия, акушерлік іс, мейіргер ісі, ардагер-ұстаз Ахметулла Шарапатұлына арналған кабинеттер ашылды.
Ашық есік күніне жиналған қонақтарға виртуалды оқу кабинеттері мен стимуляциялық бекеттердің жұмыстары көрсетілді. Шараның жалғасы колледж студенттерінің іс машықтарын көрсететін тәжірибелік шеберлік сағаттарымен қорытындыланатын болады.
Жалпы айтып өтетін болсақ, Қызылорда медициналық жоғары колледжі өңірімізде денсаулық сақтау саласына қажетті кадрларды даярлап келе жатқан ірігелі оқу орны. Колледж 1928 жылы Қазақ АССР-і Денсаулық Сақтау Комиссариатының бұйрығымен «Қазақ акушерлік техникумы» ретінде негізі қаланып, 1954 жылы «Қызылорда медициналық училищесі» болып аталды.
Тәуелсіздік жылдары оқу орнын облыстың денсаулық сақтау саласында еңбек етіп жүрген білікті басшылар басқарды. Қазіргі таңда, колледжде 6 мамандық, 10 біліктілік бойынша 2845 студент білім алуда. Оның ішінде 1212 білім алушы мемлекеттік тапсырыс негізімен қамтамасыз етілген. Оларға 119 педагог білім беруде.