«Балақайлар мектебі» бағдарламасы аясында 115 мыңнан астам бала мектепке дейінгі даярлықтан өтті.
Жазғы демалыс кезінде болашақ бірінші сынып оқушыларына тең бастапқы мүмкіндіктерді қамтамасыз ету мақсатында «Балақайлар мектебі» қысқамерзімді бағдарламасы ұйымдастырылды.
Ол бағдарлама мектепке дейінгі білім мен бастауыш мектеп арасындағы сабақтастықты қамтамасыз етіп, педагогтер мен ата-аналарға балаларды мектептегі оқу процесіне стандартты оқу бағдарламасының барлық бағыттары бойынша даярлауға мүмкіндік береді. Бағдарлама Мемлекеттік жалпыға міндетті мектепке дейінгі білім беру және оқыту стандарттарының талаптарына сәйкес әзірленген.
«Жазғы кезеңде қысқамерзімді мектепалды даярлық 2,9 мың мектепте өткізілді, бұл 115 мың мектепке дейінгі жастағы баланы қамти отырып, 5,1 мың бастауыш сынып педагогтерінің қатысуымен жүзеге асты. Оқу процесі балалардың физикалық, коммуникативтік, интеллектуалдық, шығармашылық және әлеуметтік-эмоционалдық дағдыларын дамытуға, сондай-ақ мектепте оқуға жағымды көзқарас қалыптастыруға бағытталды», — деп атап өтті мектепке дейінгі білім беру департаментінің директоры Манар Адамова.
Бұл бағдарлама балалардың оқу процесіне сәтті бейімделуі мен болашақта қажетті дағдыларын дамыту үшін жағдай жасауға бағытталған маңызды қадам болып табылады.