Аудан әкімінің қатысуымен 5 қазан – ұстаздар күніне арналған салтанатты іс-шара өтті. Мерекелік жиында аудан басшысы Жандос Еркінбекұлы ұстаздар мен білім саласының ардагерлерін құттықтап, білім беру саласындағы жетістіктер мен ұрпақ тәрбиесіндегі рөлдерін атап өтті.
Аудан әкімі ұстаздардың қажырлы еңбегі арқасында оқушылардың түрлі білім сайыстарында жоғары нәтижелерге қол жеткізіп жатқанын айтты. Ұлттық бірыңғай тестілеуде ауданымыз облыс бойынша бірінші орын алып, 54 оқушы «Алтын белгі», 67 оқушы «Үздік аттестат» иеленгенін атап өтті. Биыл 15 210 оқушы мектепке қабылданды, олардың 1 420-сы 1-сынып оқушылары.
Сонымен қатар, «Жайлы мектеп» ұлттық жобасы аясында Жосалы кенті мен ІІІ Интернационал ауылында жаңа мектептер 2025 жылы салынады деп жоспарланса, Тұрмағамбет ауылындағы №29 орта мектепке арналған 250 орындық жаңа білім ұясының құрылысы 2025 жылға белгіленді.
Марапаттау рәсімінде ауданның үлгілі ұстаздарына облыс әкімі мен аудан әкімінің алғыс хаттары табысталды. Шара соңы аудан өнерпаздарының мерекелік концертіне ұласты.