Қорқыт ата атындағы Қызылорда университетінде физика-математика ғылымдарының кандидаты, белгілі ғалым-ұстаз, университет ардагері Әбділда Төрешбаевтың 75 жас мерейтойына арналған салтанатты жиын өтті.
Мерекелік шарада ғалымның өмір жолы мен ғылыми жетістіктері кеңінен баяндалды. Басқарма Төрағасы-ректор Бейбіткүл Кәрімова мерейтой иесін құттықтап, құрмет көрсетті. Университет басшысы Әбділда Төрешбаевтың қызметтегі жауапкершілігі мен білім беру саласындағы адал еңбегін атап өтті.
Ғалым 1978 жылдан бастап Қорқыт ата атындағы Қызылорда университетінің оқытушысы, аға оқытушысы, доцент, кафедра меңгерушісі, қауымдастырылған профессор қызметтерін абыроймен атқарып келеді. Аспан механикасы және ғарыштық динамика, қозғалыстың орнықтылық теориясы және дифференциалдық теңдеулер теориясы салалары бойынша 153-тен астам ғылыми еңбегі жарияланып, 20-дан астам оқу-әдістемеліктің авторы атанды.
Жиында ғалым Қызылорда облысының және Қызылорда қаласының “Құрмет” грамотасымен наградталды. Сондай-ақ, «AMANAT» партиясы Қызылорда қалалық филиалының төрағасы Ибадулла Құттықожаевтың құттықтау хаты табысталды.
Сонымен қатар, ғалымның шәкірті, облыс әкімі аппаратының «Ақпараттық технологиялар орталығы» КММ директоры, техника ғылымдарының кандидаты, PhD докторы Сәбит Ибадулла құттықтау сөз сөйлеп, ұстазына деген ризашылығын білдірді.
Салтанатты жиынға университет ұжымы, білім алушылар, ғалымның шәкірттері мен әріптестері қатысты. Студенттер ұстазға деген ыстық ықыластарын әсем әнмен жеткізіп, мерекелік көңіл-күй сыйлады.