Бүгін аудан әкімі Мейрамбек Шермағанбеттің төрағалығымен бірқатар өзекті мәселелерге байланысты арнайы мәжіліс өтті. Жиынды бастамас бұрын аудан басшысы алдымен орын алған кадрлық өзгерістерге тоқталды.

-Ағымдағы жылдың 21 сәуірінде өкілеттілігі мерзімінен бұрын аяқталған Сарыкөл ауылдық округ әкімінің сайлауы өткізіліп, ауыл халқы өз таңдауларын жасады. Өткізілген сайлаудың қорытындысымен кандидат Бердімұрат Рахымжан Дабылұлы Сарыкөл ауылдық округі әкімі болып сайланды.

-Сондай-ақ, Қазалы аудандық отбасын қолдау орталығының директоры болып Сералиев Нұркен Жарболұлы тағайындалды, – деген аудан әкімі жаңа ауыл әкімі мен орталық директорының алдағы қызметіне сәттілік тіледі.

Мәжілістің күн тәртібінде аудан көлеміндегі егін егу науқанының өту барысы, әлеуметтік маңызы бар азық-түлік тауарларының қоры мен бағасын реттеу және санитарлық тазалық, көркейту-көгалдандыру жұмыстары мәселелері талқыланды.

Мәжілісте қаралған егін егу науқаны мен азық-түлік бағасын тұрақтандыру мәселері бойынша аудандық ауыл шаруашылығы мен жер қатынастары бөлімінің басшысы Еркін Сейтов баяндама жасады.

Ал, аудандағы санитарлық тазалық, көркейту-көгалдандыру жұмыстары жайында аудандық тұрғын үй коммуналдық шаруашылығы, жолаушылар көлігі және автомобиль жолдары бөлімі басшысының міндетін атқарушы Жасұлан Сыдықов баяндады.

Биылғы жылы ауданымызда 17 377 гектар жерге ауыл шаруашылығы дақылдарын орналастырылуда. Оның ішінде негізгі дақыл күрішті 6200 гектар жерге егу жоспарланған.

Мәжілісте аудан әкімі егіс науқанына аса жауапкершілікпен қарап, тиісті жұмыстарды жоғары деңгейде ұйымдастыру қажеттігін айтты. Негізгі дақыл – күріш егу жұмыстарын жоспарға сәйкес орындауды тапсырды. Ал, жауапты мекемелерге бұл науқандағы ең маңызды мәселе – суға қарыз болған шаруашылықтардың қарыздарын өтеу жұмыстарын жеделдетуді қатаң тапсырды. Мәжіліс барысында ауыл әкімдеріне тұрғындардың бау-бақша егіп, өздеріне қажетті картоп, жуасын және өзге де қажетті дақылдарын егіп алуына қажетті жағдайды жасау жөнінде де нақты тапсырмалар берілді.

Мұнан соң аудан басшысы нарықта халық тұтынатын әлеуметтік маңызы бар азық-түлік тауарларының қоры жеткілікті әрі бағасы тұрақты болуы қажеттігін айтты. Бұған қатысты арнайы жұмысшы тобы құрылып азық-түлік бағаларының өсім алмауына күнделікті мониторинг жүргізуді тапсырды. Осы орайда ауыл шаруашылығы мен жер қатынастары бөлімінің басшысы Еркін Сейтовке әлеуметтік дүкендермен сауда орындарында әлеуметтік бұрыштар ашып, тұрақтандыру қорының өнімдерін белгіленген бағада сату жұмыстарын жүргізу жөнінде тапсырма берілді.

Өткен жылы ауыл шаруашылығы саласында өндірілген өнім көлемі – 24 млрд. 971,1 теңгені құрап, алдыңғы жылмен салыстырғанда 101,5 пайызға жетті. Аудан бойынша барлығы былтырғы жылы 17 377 га жерге ауыл шаруашылығы дақылдары орналасты. (меже 17 612 га, 98,4 %). Оның ішінде негізгі дақыл күріштің көлемі 6 450 гектар құрайды.

Сырдария өзенінде қалыптасқан су тапшылығына байланысты биік жерлерге орналасқан күріш егісінің көлемін 543 гектарға қысқартып, әртараптандыру бағытындағы дақылдарын егіс көлемін ұлғайтуға ерекше мән берілді. Су тапшылығының алдын алу үшін өткен жылы Басықара, Құмжиек, Майлыбас ауылдарына 3 дана көтерме насос сатып алынып, коллекторлар жөндеуден өткізілді.
Есепті кезеңде ауданнан 6 шет мемлекетке (Ресей, Белоруссия, Дания, Германия, Қытай, Нидерланды) 1030 тонна күріш, 1030 тонна балық өнімі және 1267 тонна қамыс экспортталды. Мал шаруашылығына келсек, төрт түліктің барлық түрінде өсім бар. Қазір аудандағы мал басының басым бөлігі, яғни 65,7 пайызы жеке тұлғаларда, 2,3 пайызы ауылшаруашылық кәсіпорындарында, 32,0 пайызы шаруа қожалықтарының үлесінде. Мал шаруашылығын дамыту мақсатында қаржы ұйымдары тарапынан жергілікті шаруа қожалықтардың жалпы құны 246,3 млн. теңгені құрайтын 29 жобасы қаржыландырылды.

Жиын соңында қала, кент және ауыл әкімдеріне аудандағы санитарлық тазалық мәселесі күн тәртібінен түспейтінін айтып, Әйтеке би кентіндегі белгіленген 7 аймақ пен барлық округтерде тазалық жұмыстарын ұдайы жүргізіп отыруды ескертті.

БӨЛІСУ