Бастауыш ұйым – партияның негізгі күші.
Бүгін Қызылордада бастауыш партия ұйымдарының облыстық форумы өтті. Онда бастауыш ұйымдардың мәртебесі мен белсенділігін арттыру, сонымен қатар ұйымдар жұмысын жетілдіру жолдары талқыланды.
Форумға 46 мыңға жуық партия мүшесін біріктіріп отырған 206 бастауыш ұйымның төрағалары қатысты.
«Соңғы жылдары елімізде ауқымды саяси жаңғыру жұмыстары жүргізілді. Атап айтсақ, Конституцияға өзгерістер мен толықтырулар енгізіліп, Президент, Парламент Мәжілісі мен мәслихаттар сайлауының жаңа форматы, ауылдар мен аудандар әкімдерін сайлау секілді ауқымды саяси өзгерістер орын алды. Бастауыш ұйымдар бұл саяси өзгерістердің бел ортасында болып, партияға жүктеліп отырған жаңа талаптарды зор сенім, аса жауапкершілікпен жүзеге асыруға атсалысты»,- деді форум жұмысына сәттілік тілеген партияның облыстық филиалының төрағасы Наурызбай Байқадамов.
Филиал төрағасының айтуынша бастауыш ұйымдар партия бастамаларын халыққа жеткізумен қатар, қоғамның әрбір мүшесіне бағытталған партиялық жобалардың іске асуына үлес қосып, ел Президентінің «Халық үніне құлақ асатын мемлекет» тұжырымдамасына сай халықпен кері байланысты нығайтып, азаматтардың құқықтары мен бостандықтарын қорғау, халықтың тұрмыс сапасын жақсарту бағытында шараларды іске асырып келеді. Бұл үшін партияның облыстық филиалы 500-ден аса партия мүшесі бар 11 ірі бастауыш ұйым алаңында депутаттар мен мекеме басшыларының қоғамдық қабылдауларын ұйымдастыруды тұрақты жолға қойған. Мәселен, жыл басынан аталған ұйымдарда 14 қабылдау өтіп, тұрғындардан түскен өтініштердің 21-і оң шешілсе,12 мәселе бойынша қолданыстағы заңнамалар аясында кеңестер берілген. Бұл сайлаушылардың партияға деген сенімін білдірсе, екінші жағынан ұйымдар жұмысының дұрыс бағытта келе жатқанын айқындайды.
Форум жұмысы екі бөлімнен тұрды. Алғашқы бөлімде жауапты бөлім басшылары партия жұмысының бастауыш ұйымдарға қатысты негізгі бағыттары бойынша арнайы түсіндірме жұмыстарын жүргізіп, әдістемелік құралдар ұсынды. Сонымен қатар, жұмыс барысында туындайтын ортақ проблеммалық мәселелер талқыға салынып, оларды шешудің нақты жолдары айтылды. Екінші бөлімде әлеуметтік кәсіпкерлік: партиялық жобалар үшін жаңа мүмкіндіктер тақырыбында семинар өтті. Семинарды әлеуметтік инноваторлар қауымдастығының вице-президенті, әлеуметтік кәсіпкер, Қазақстандық оқу ойыншықтар бренді «Global Kishkentai» инклюзивті шеберханасының негізін қалаушы Гүлмира Пармышева өткізді.
Жалпы өңірде партия филиалымен атқарылған жұмыстар аз емес. Бастауыш ұйымдар партияның әрбір бастамасын жергілікті жерде табысты жүзеге асыруға белсене атсалысып жатыр. Мәселен, екі айда «Қарызсыз қоғам» жобасы аясында 1000-ның үстінде өңір тұрғыны қаржылық сауаттылығын арттырса, өткен жылы «Жер аманаты» жобасы шеңберінде 225,3 мың гектар жер мемлекет меншігіне қайтарылған. «Ауыл аманаты» жобасы бойынша ауыл тұрғындарына 3 млрд теңгені құрайтын 406 жобаға несие берілген.Бұл игілікті істер бастауыш ұйымдарға топтасқан партия белсенділерімен биыл да жалғасын таппақ.