Биылғы жылдың 27 ақпан күні № 6 сайлау округінен сайланған депутат Әбдіқалықов Мұса Жақыпұлы сайлау округіне қарасты С.Лапин атындағы № 261 орта мектебінде болып, мектептің жай-күйімен танысып, мектеп мұғалімдерімен кездесу өткізді.
Кездесу барысында мұғалімдер осы округтің тұрғындары ретінде бірқатар мәселелер көтеріп, шешілуіне ықпал етуді сұрады:
-Мектеп жанындағы Қарақұм, Жерұйық, Әл-Фараби – 10 көшелерін жарықтандыру;
-Мектеп жанында орналасқан скверге спорт алаңын салу;
-Мектеп жанында орналасқан сквердің қасына полиция бекетін орнату;
-Осы аумақта тұратын тұрғындардың № 2 қалалық емханаға қатынауы үшін қоғамдық көлік мәселесін шешу;
-№ 2 бағыттағы қоғамдық көліктің сирек қатынауы.
Сонымен қатар, кездесу барысында М.Әбдіқалықов мектептің былтырғы жылы ағымдағы жөндеуден өткен спорт залының, мектеп әжетханаларының жағдайымен және мектеп ауласына салынған бастауыш және жоғары сынып оқушыларына арналған спорт алаңдарының жай-күйімен танысты.
Қазіргі уақытта қалалық мәслихат депутаттары «ҚР жергілікті мемлекеттік басқару және өзін-өзі басқару туралы» ҚР Заңының 21-бабына сәйкес өз сайлау округтерінде орналасқан мекеме ұжымдарымен кездесулер ұйымдастыруда.