Жаңақорған аграрлы-техникалық колледжінде белгілі айтыскер ақын, сазгер, термеші, білім саласының ардагері Нұрберген Тастаевты еске алуға арналған волейболдан облыстық чемпионат өтті.
Спорттық шара облыстық білім басқармасының техникалық және кәсіптік білім беру ұйымдары ардагерлерін еске алу және есімдерін ұлықтау бойынша іс-шара жоспарына сәйкес ұйымдастырылды.
Жарыстың ашылу салтанатында аудандық білім бөлімі басшысының міндетін атқарушы Б. Есенбаев ардагер ұстаздың техникалық және кәсіптік білім саласына қосқан ерекше үлесін сөз етсе, бірге қызмет жасаған әріптестері өнер мен спорт саласындағы жетістіктерін айтты.
Нұрберген Назарұлы саналы ғұмырында өнер мен білімді ұштастырып, ел есінде арқалы ақын, термеші, жырау, сазгер, тілге жүйрік шешен ретінде қалған дара тұлға. Ауданның өнер, мәдениет саласындағы бірқатар қызметте басшылық жасап, Жаңақорған аграрлы-техникалық колледжінің директоры болды.
Елеулі еңбегінің нәтижесінде Қазақстан Республикасының мәдениет қайраткері атанды. Сазгердің 50-ге жуық әні жарыққа шығып, тыңдарман қауымның ерекше ықыласына бөленді.
Спорттық бәсекеге аймақтағы техникалық және кәсіптік білім беру ұйымдарынан барлығы 8 команда, 100-ге жуық мұғалімдер қатысты.
Нәтижесінде Шиелі индустриалды-аграрлы колледжі үздік үштікті түйіндесе, Арал көпсалалы колледжі ІІ орынды иеленді. Ал әдемі ойын өрнегін көрсетіп, үздіктер қатарынан көрінген Жаңақорған аграрлы-техникалық колледжі жарыстың жеңімпазы атанды.
Айта кеткен жөн, ардагерді еске алу арналған жарыс алдағы уақытта дәстүрлі түрде ұйымдастырылмақ.