«Атамекен» ҰКП ұлттық жоба аясында ШОБ-ты қаржылай емес қолдау шараларын дамытуда.
Қаржылай қолдау шараларымен қатар, мемлекет елдегі кәсіпкерлікті қаржылай емес қолдау мен дамытудың бірқатар шараларын айқындап, бизнеспен серіктестікте жүзеге асыруда. Бұл туралы ОКҚ дөңгелек үстелінде спикерлер айтып берді.
Бірқатар қаржылық емес қолдау шаралары «Атамекен» ҰКП-ға жүктелген. Бұл туралы «Атамекен» ҚР ҰКП Жұмыспен қамту мен шағын және әйелдер кәсіпкерлігін дамыту департаментінің директоры – басқарушы директоры Айдана Тоғызбаева айтып берді.
Кәсіпкерлікті дамыту жөніндегі ұлттық жоба аясында палата 3 негізгі бағыт бойынша оператор болып табылады, деді ол. Бұл кәсіпкерлер мен кәсіпкерлік бастамасы бар халыққа арналған ақпараттық-консультациялық қызметтер. Екіншісі – «Мен кәсіпкер» кәсіпкерлік әлеуетін дамыту. Үшіншісі – кәсіпкерлік қызметке сервистік қолдау көрсету.
«ШОБ үшін тегін қызметтер аудандық деңгейде және моноқалаларда 199 Кәсіпкерлікке қызмет көрсету орталығында офлайн режимде ұсынылады. Қала тұрғындары үшін қызмет тиісті портал арқылы онлайн көрсетіледі», – деді ҰКП өкілі.
Оның айтуынша, 2023 жылдың 1 тамызындағы жағдай бойынша 11400 ШОБ субъектісі мен жеке тұлғалар үшін 89 мыңнан астам қызмет көрсетілді. Әйелдер кәсіпкерлігін дамыту орталықтарында қызметтердің 7 түрі ұсынылады. Бұл кәсіби бизнеске оқытуды ұйымдастыру, менторлық, қаржыландыруды тартуға оқыту, әйелдер бизнесінің халықаралық деңгейге шығуына көмектесу және т. б.
5100 кәсіпкер әйелге 5,5 мың осындай қызмет көрсетілді. 3800-ден астам консультация беріліп, 1 мыңнан аса әйел курстарда кәсіптік оқудан өтті.