Бүгін облыс орталығында «Ақ жаулығым – тұмарым» тақырыбында әжелер ансамбльдерінің облыстық байқауы өтті. Оған Сырдария ауданынан Тереңөзек кенті клубы жанынан құрылған «Ару Ана» әжелер ансамблі қатысып, өнер көрсетті. Іс-шараға Қызылорда облыстық ардагерлер кеңесінің төрағасы Серік Дүйсенбаев бастаған ардагерлер мен өнерсүйер қауым қатысты.
Байқау шарты үш кезеңді қамтыды. Осы кезеңдер бойынша жоғары деңгейде өнер көрсеткен «Ару Ана» әжелер ансамблі қала, аудандардан қатысқан әжелер ансамбльдерінің ішінен жүлделі үшінші орынды жеңіп алды.
Әжелер ансамблі «Қызым саған айтам, келінім сен тыңда» кезеңінде қазақтың бесікке салу дәстүрін көрсетті. «Қолөнер – зор өнер» кезеңінде әжелеріміз қолдан жасалған құрақ өнерімен таңдандырды. Ал «Ән – халық мұрасы» кезеңінде халық әні «Сәулем-айды» орындап, көрермен ықыласына бөленді.
Ардагер ұстаз Жұмакүл Көшербаева жетекшілік ететін әжелер ансамблінің құрылғанына биыл 10 жыл толып отыр. Жастарға үлгі-өнеге көрсетіп жүрген құрметті жандарды облыстық байқауда жеткен жетістігімен құттықтаймыз!
Айта кетейік, Сырдария аудандық музей қызметкерлері облыстық байқауда ауданның қолөнер шеберлерінің туындыларынан көрме ұйымдастырды.