Балық етінің көлеңкелі айналымымен күресу үшін балық өнімдерін қадағалаудың ақпараттық жүйесі әзірленуде.
ҚР Экология және табиғи ресурстар министрлігі Балық шаруашылығы комитеті төрағасының орынбасары Аян Бахиянов ақпараттық жүйенің саланы балық аулаудан немесе шетелден әкелінгеннен бастап жүйелеуге бағытталғанын атап өтті.
Әзірлеушілердің айтуынша, қазіргі уақытта бұл жүйе сынақтан өткізілуде. 2024 жылдың І тоқсанында оны өнеркәсіптік пайдалануға беру жоспарлануда.
«Жыл соңына дейін жүзу құралдарын, қайық моторларын, нысанды киім-кешектер, сондай-ақ құқық бұзушылықтарды тіркеуге және ресімдеуге арналған арнайы жабдықтар сатып алу жоспарлануда», – деді спикер баспасөз конференциясында.
Қазіргі уақытта экология және табиғи ресурстар министрлігі браконьерлермен күресу үшін дрондар мен түнгі көру құралдарын сатып алуда.
«Браконьерлер әдетте жол талғамайтын техниканы пайдаланады, көбінесе қамыстың арасында жасырынады, сондықтан оларды анықтау қиынға соғады. Жаңа техника браконьерлерді тез анықтауға және құқық бұзушылықтарды тіркеуге мүмкіндік береді», – деді Экология министрлігінің өкілі.