Қарулы күштердің жауынгерлік біліктілігі, мемлекеттің жұмылдыру әзірлігі шешуші мәнге ие – ОКҚ брифингі.
Д.Абдуллинн атап өткендей, жалпы оң және теріс тәжірибені Бас штаб әскери жоспарлау құжаттарында, әскерлерді жедел-жауынгерлік және жұмылдыру даярлығы іс-шараларында ескереді.
Жергілікті атқарушы және орталық мемлекеттік органдарды жедел даярлау іс-шараларына тарту дәстүрге айналуда, деп атап өтті әскери ведомство өкілі. Бұл ретте ол «Батыс-Тойтарыс» оқу-жаттығуы туралы айтып берді, оның аясында министрліктердің басшыларын, облыс әкімдерін, сондай-ақ осы өңірлердің қорғаныс-өнеркәсіп кешенінің басшыларын тарта отырып, әскери басқарудың орталық органдарын – Жоғарғы Бас қолбасшылықтың ставкасын өрістету мәселелерін пысықтау көзделіп отыр.
«Биыл сәуір айында дағдарыстық жағдайларға ден қою бойынша өзара іс-қимылды пысықтау мақсатында «Бекет» кешенді оқу-жаттығуы өткізілді. Оқу-жаттығуға күш құрылымдарынан басқа, орталық мемлекеттік органдардың аумақтық бөлімшелері атынан азаматтық сектор өкілдері қатысты. Жеке құрамнан 4 мыңға жуық адам мен 90 бірлік қару-жарақ пен әскери техника тартылды», – деді спикер.
Оқу-жаттығу төтенше және әскери жағдай режимдерін енгізе отырып, облыстың қорғаныс кеңесінің жедел штабтарының қызметін ұйымдастыру бойынша оқу мәселелерін пысықтаумен екі кезеңде өткізілді.
«Көктал» полигонында оқу-жаттығудың соңғы кезеңінде десанттық-шабуылдау әскерлерінің, күштік құрылымдар бөлімшелерінің, Ұлттық ұланның, ҰҚК Шекара қызметінің, ТЖМ заңсыз бандалық құрылымдарды бұғаттау және жою, сүзу пунктінің жұмыс істеуі, босқындарды орналастыру бойынша бірлескен іс-қимылдарының практикалық көрсетілімі өткізілді. Дағдарыс жағдайында басқару шешімдерінің жедел қабылдануына және ден қойылуына әсер ететін негізгі проблемалар анықталды», – деді ҚР ҚК Бас штаб департаментінің бастығының орынбасары.
Жетісу облысының әскерлері мен жергілікті атқарушы органдарының әрекеттеріне жоғары баға берілді. Оқу-жаттығудың барлық міндеттеріне қол жеткізілді, деп түйіндеді спикер.
Бүгінгі таңда әлемдегі және аймақтардағы жағдайларға байланысты Қарулы күштердің атқаратын рөлі маңызды. Қазіргі ішкі және сыртқы қауіптер еліміздің әскери қауіпсіздігіне ерекше көңіл аударуды қажет етіп отыр.
Осыған орай азаматтарымыз «Егер ел басына күн туса Қарулы күштеріміздің қандай мүмкіндігі бар?» деген сауалдарды жиі қоятыны рас», дейді спикер. Сондықтан ол әскерлердің даярлығын ұйымдастырудағы жаңа бастамалар және Қарулы күштерде өткен оқу-жаттығулар туралы егжей-тегжейлі баяндады.
«Соңғы екі жылда Қарулы күштердің құрылысы мен дамуы бойынша үлкен жұмыстар атқарылды. Жаңа мемлекеттік жоспарлауға сәйкес әскери қауіпсіздік саласы жөніндегі құжаттар қайта әзірленді. Мемлекет басшысы Қарулы күштердің даму тұжырымдамасын бекітті. Әскери доктринаны қайта жандандыру жұмыстары жүргізілді», – деді Д. Абдуллин.
Қазір Қазақстанның Қарулы күштерінің құрылымы жетілдірілуде. Өңірлік қолбасшылық пен десанттық шабуылдау әскерлерінің жауапты аймақтары нақтыланды. Мемлекет басшысының Қарулы күштердің дағдарысты ахуалдарға барабар ден қоюына қатысты әзірлігін арттыру бойынша тапсырмасы аясында дағдарысты жою және оның алдын алу үшін негізгі құрал ретінде арнайы операциялар күштерін құру жалғасуда
«Урбанизацияланған жерлердегі іс-қимылдағы бейімделген бөлімшелерді құру жоспарланған. Десанттық шабуылдау әскерлерінің жауынгерлік мүмкіндігін арттыру шаралары өзектендірілуде. Жүзеге асырылған іс-шаралар тез және батыл іс-қимылдарда десанттардың әмбебап құрал ретіндегі рөлін арттыру мүмкіндік берді», – деді полковник.
Сонымен қатар шекарашылардың, Ұлттық ұлан және Төтенше жағдайлар министрлігінің құтқарушы компоненттерінің дамуымен тығыз байланыста Қарулы күштер саласында стратегиялық бағыттардағы дербес топтар құру жалғасуда.
Д. Абдуллин сондай-ақ қазіргі таңда бірде-бір қарулы қақтығыс ұшқышсыз ұшатын авиацияны қолданусыз өтпейтінін ескере отырып, осы бағытты дамыту мақсатында Бас штабта Ұшқышсыз авиациялық кешенді дамыту департаменті құрылғанын айтты.
«Армияны қайта құруда осындай бірқатар қадам жасалуда. Бұл процестің күрделі екенін ұғып отырмыз. Өткізілетін іс-шаралардың тиімділігі көбінесе мемлекетіміздің экономикалық жағдайы мен және мүмкіндігімен айқындалады. Қазіргі таңда Қарулы күштеріміз қарсыластың кеңінен қолданатын дәстүрлі немесе гибридті әдістері мен күрес жүргізетін әр түрлі ауқымдағы әскери қақтығыстарда мемлекетіміздің мүдделерін қорғауға әзір болуы керек», – деп түйіндеді сөзін Қарулы күштер департаменті бастығының орынбасары.